Thaçi u tërhoq nga padia kundër Serbisë

  • 23 March 2017 - 07:44
Thaçi u tërhoq nga padia kundër Serbisë

Nuk pritet që pala kosovare të kërkojë as kompensim për dëmet e luftës,shkruan gazeta Kosova Sot.

Ndonëse një vit më parë, presidenti i Kosovës, Hashim Thaçi, pati paralajmëruar padi të shpejtë nga institucionet e Kosovës ndaj Serbisë, për krime lufte dhe gjenocid, koha po kalon dhe ai ka filluar të merret me tema të tjera, sikurse dhe Qeveria e Kosovës. Zotimi për padi kundër Serbisë po mbetet një retorikë vetëm për konsum e mashtrim dhe gënjeshtër e ligë politike. Gazeta ka adresuar edhe pyetje konkrete në presidencë për të mësuar se në çfarë faze është procesi përgatitor për një padi të tillë, dhe kur do të ushtrohet ajo, por nuk ka marrë përgjigje. Njohës të fushës së drejtësisë dhe analistët politikë vazhdojnë të jenë shumë kritikë karshi faktit që institucionet nuk kanë bërë asnjë hap për ta paditur Serbinë, jo vetëm për gjenocid, por edhe për dëmet e luftës që i ka shkaktuar gjatë luftës së fundit. Bile edhe ato padi që janë ushtruar nëpër gjykatat e Kosovës nuk janë shqyrtuar, ose janë refuzuar pa asnjë baze ligjore. "Paralajmërimi i një viti më parë dhe me pompozitet i presidentit Thaçi, se do të ngrejë padi kundër Serbisë për krimet e luftës, nuk ishte asgjë tjetër, veçse një retorikë për konsum të brendshëm politik dhe mashtrim i radhës për qytetarët. Gënjeshtra dhe hipokrizia politike e Thaçit, iu kthye bumerang qytetarëve të vendit", është shprehur analisti Florim Zeqa.

Koncesion pas koncesioni

Sipas Zeqës me veprimet e pamatura politike, me përulje nënshtruese e poshtëruese pranë varrezave dhe lapidarëve serbe, me mbishkrimin "Viktima të terrorit shqiptar", presidenti i ka hapur rrugën Serbisë gjakatare për ngritjen e akuzave ndaj shqiptarëve e në veçanti ndaj luftëtarëve të lirisë. "Si rezultat i këtyre veprimeve dhe mungesës së ngritjes së një aktakuze nga ana e institucioneve shtetërore të Kosovës ndaj Serbisë për gjenocid dhe për dëmet e luftës, kësaj të fundit i ka lehtësuar punën për marrjen e ofensivës në prag të fillimit të punës së Gjykatës Speciale, e cila kryesisht do të merret me krimet e shqiptarëve!", tha analisti politik Florim Zeqa. Ai konsideron se heshtja dhe indiferenca e institucioneve shtetërore të Kosovës për 18 vite rresht ndaj krimeve serbe, përveç rehabilitimit politik e ka amnistuar Serbinë për krimet monstruoze të luftës në Kosovë. "Akuzat dhe paditë individuale ndaj shtetit serb në gjykatat e Kosovës, nuk janë shqyrtuar ose janë refuzuar pa asnjë bazë ligjore, me qëllim që të kursehet Serbia, si ish-shtet i tyre okupues, por edhe sot i respektuar nga politika e Gjyqësori i nënshtruar, i mjerë dhe i inkriminuar skajshmërisht", ka thënë ai. "Bazuar në përvojat e deritanishme, deklarimet pompoze të Thaçit, gjithnjë kanë përfunduar me koncesione politike ndaj Serbisë. Andaj edhe iniciativa e fundit e tij, kokë më vete pa u konsultuar fare me spektrin politik vendor dhe miqtë ndërkombë- tarë për bërjen e ushtrisë me projektligj, shumë lehtë mund të përfundojnë me koncesione të reja për Serbinë dhe me pasoja afatgjata për vendin, si pasojë e lëkundjes së raporteve fqinjësore me aleatin dhe sponzorizuesin e pavarësisë së shtetit tonë-SHBA-të dhe NATO-n!", tha Zeqa për "Kosova Sot".

Presioni i Speciales

Analisti politik, Blerim Burjani, thotë se me këtë temë vazhdimisht ka pasur shumë taktizime politike, por nuk është bërë asnjë lëvizje përpara. "Për një kohë të gjatë është testuar ngritja e padisë ndaj Serbisë për krime lufte të bëra në Kosovë, sikurse edhe për dëmet e mëdha ekonomike që i ka shkaktuar shteti serb Kosovës. Një kohë të gjatë ka pasur mendime se BE-ja nuk e dëshiron këtë ngritje të padisë ndaj Serbisë, për shkak të dialogut që mund të vihet në pyetje, varësisht prej zhvillimeve dhe agresivitetit serb ndaj njerëzve të luftës dhe akuzave të saj", ka thënë ai. Sipas tij, tani edhe retorika e Thaçit ka ndryshuar pas themelimit të Gjykatës Speciale dhe akuzave të Dick Martit, edhe më pastaj kjo retorikë ka vazhduar me shumë zhurmë për ngritje padie ndaj Serbisë varësisht nga zhvillimet, që janë politike në Kosovë. "Deri më tani asnjëherë nuk u bë publik materiali i mbledhur për krime lufte të Serbisë në Kosovë, andaj edhe opinioni nuk është fare i njoftuar se çka përmban akuza e plotë ndaj Serbisë, nëse ajo veç është përgatitur eventualisht", potencoi ai. Sipas Burjanit në saje të presionit që bën Gjykata Speciale ndaj disa individëve të fuqishëm edhe politikisht financiarisht mund të ndodhë që të ngrihet ndonjë padi edhe ndaj Serbisë, por kjo mbetet të shihet në vazhdim, edhe pse realisht zhvillimet politike në Kosovë janë mjaft të ndjeshme, që po përcillen edhe me tensione, që mund të çojnë për një kohë më të shpejtë në zgjedhje të parakohshme nacionale.

Politika e injoroi çështjen

Edhe prof. Muhamet Kelmendi thotë se shumë herë është folur e shkruar e kërkuar për temën e dëmeve të luftës, për krimet, madje janë bërë edhe shumë analiza për gjenocidin si vepër e rëndë penale, sikurse edhe për dëmin material dhe atë moral të shkaktuar nga regjimi serb në Kosovë, por institucionet nuk kanë shkuar përtej këtyre analizave për të vepruar. "Natyrisht se përgjegjësinë për mosparaqitjen e një padie për gjenocide e ka kryesisht Qeveria e Kosovës. Që nga shpallja e pavarësisë kanë kaluar mbi 9 vjet dhe ende nuk kemi të dhëna definitive, jo për vrasjet, por edhe për shkatërrimet e mëdha të bëra. Kjo tregon për dështimin dhe natyrisht se përgjegjës është kryesisht Hashim Thaçi, për dy mandate në pozitën e kryeministrit. Por, edhe tash Isa Mustafa që kurrë nuk u interesuan për çështjet e tilla të rënda për Kosovën", tha Kelmendi për "Kosova Sot". Ai ka pohuar se kryesisht deri më tani ka disa arsyetime që, sipas tij, janë krejtësisht të kota dhe të pabaza, që thirren në pamundësinë e ushtrimit të padisë kundër Serbisë duke mos qenë me ulëse në OKB. "Shtrohet tani pyetja a kemi apo nuk kemi Subjektivitet të pavarur? Kemi apo nuk kemi bazë ligjore për padi pranë organeve kompetente ndërkombëtare për gjenocid. Mendoj se po, kemi bazë edhe mundësi. Kosova e ka përkrahur shtetin shqiptar", tha Muhamet Kelmendi për "Kosova Sot". Edhe prof. Riza Smaka, fajin kryesor e adreson tek ekzekutivi i vendit, i cili duhet të prijë me ekspertizë në këtë proces, ta kalkulojë faturën e plotë të dëmeve të luftës dhe të ndjekë të gjitha rrugët e mundshme ligjore për të kërkuar kompensimin adekuat nga shteti serb, në cilësinë e agresorit. "Unë si deputet i Kuvendit të Kosovës, që në legjislaturën e tretë, kam kërkuar dhe reaguar si i pari deputet, dhe si duket kam mbetur edhe i vetmi deri më tani, që e kam pas ngritur këtë temë si shqetësim serioz adresuar karshi Qeverisë së asaj kohe, për të vepruar konform me interesat e vendit e veçanërisht të të dëmtuarve të pafajshëm nga krimet e luftës së soldateskës serbe. As ekzekutivi i atëhershëm e asnjëri sish deri më nuk ka ndërmarrë ndonjë veprim të vetëm në këtë drejtim, dhe as tani nuk po duket në sipërfaqe se do të ketë veprime më të shpejta", tha prof. Riza Smaka.
(Kosova Sot)