Erdogan s’ndalet, thotë se do t’i vazhdojë sulmet brenda territorit sirian dhe irakian
Presidenti i Turqisë, Recep Tayyip Erdogan, thotë se vendi i tij mund të ndërmarrë veprime tjera ushtarake kundër militantëve kurdë në Irak dhe Siri, duke thënë se përkrahja e SHBA-së për grupe të tilla duhet të marrë fund patjetër.
Ai ka thënë më tej se do ta diskutojë këtë çështje në një takim me presidentin e SHBA-së, Donald Trump, muajin e ardhshëm.
SHBA-ja ka ofruar mbrojtje nga ajri dhe përkrahje tjetër për forcat kurde që luftojnë kundër ISIS-it.
Turqia, anëtare e NATO-s, i sheh forcat kurdo-siriane si shtrirje të kryengritjes kurde në Turqi.
Javën e kaluar, Turqia kreu sulme ndaj caqeve kurde në Siri dhe Irak.
Që nga atëherë, trupat amerikane janë duke patrulluar në kufirin e tensionuar.
“Ne do të jemi të detyruar që t’i vazhdojmë ofensivat. Nuk tregojnë datë apo kohë se kur do ta bëjmë. Por ata e dinë se ushtria turke do t’iu vijë,” ka thënë Erdogan.
(Kosova Sot)
