Nuk ka paraburgim as për deputetin Ejup Alimi

Seanca e Gjykatës së Apelit për ankesat e Prokurorisë Speciale Publike (PSP) ka përfunduar duke mos caktuar masën e paraburgimit për Ejup Alimin, deputet i BDI-së, i përfshirë në lëndën ”Titanik 3”.

Prokurorja Speciale Fatime Fetai deklaroi para gjykatësve se kjo e fundit nuk e ka lexuar deri në fund propozimin e PSP-së dhe se gjykata ka përmendur gabimisht Ismet Gurin për ndikim ndaj dëshmitarëve, e jo Ejup Alimin.

Nga ana tjetër, mbrojtja ka deklaruar se akuza e PSP-së është e kotë pasi që nuk ka dëshmi që gjykata të vendosë nëse Alimi ka ndikuar, apo jo, te dëshmitarët.

Vetë, Ejup Alimi pohoi se është i pafajshëm dhe se do të vijë për dëshmi edhe nëse do të burgosej diku tjetër. Përndryshe lënda ka të bëjë me shkatërrim të materialit zgjedhor.

(Kosova Sot)