Sërish probleme! Shukri Xhelili apartament 30 mijë euro në plazh djalit... të pajustifikuar!

Shumë pak nga momenti kur fitoi lirinë, Shukri Xhelili, ish-kryebashkiaku i Dibrës, i akuzuar për marrëdhënie seksuale duke shpërdoruar detyrën, do të përballet sërish me drejtësinë.

Prokuroria e Dibrës e ka gjetur atë fajtor për veprën penale të fshehjes së pasurisë, dhe e ka dërguar dosjen në gjykatë. Gjatë kësaj kohe, Xhelili është hetuar në liri, pa masë sigurimi, ndërsa hetimi nisi në bazë të një kallëzimi nga Inspektorati i Deklarimit dhe Kontrollit të Pasurisë.

Sipas hetimeve, Xhelili nuk justifikon me dokumente zyrtare kontratën për blerjen e një apartamenti në zonën e plazhit në Durrës, me vlerë 34.000 euro, në emër të djalit të tij.

“Në kallëzimin e dorëzuar nga ILDKP, pretendohej edhe për disa asete të tjera, të krijuara në mënyrë të dyshimtë ose të padeklaruara, por nga hetimi rezultoi se këto elementët të kallëzimit nuk provoheshin përtej dyshimit të arsyeshëm”, thotë prokuroria.

Ndërsa për apartamentin në Durrës, vetë Xhelili ka sqaruar pranë organit të akuzës, se

“Në vitin 2013, një ndër marrëveshjet që ka lidhur djali i tij Ervis Xhelili ka qenë me kompaninë T...C.... shpk, ku ka marrë përsipër vendosjen e dritareve, grilave si dhe të gjitha punimet e natyrës së shërbimit që ofronim, në kushtet kur firma T...C.... shpk i ka ofruar një apartament për të likujduar shumën e shërbimit të ofruar, djali ka bërë marrëveshje fillimisht verbale në mirëbesim në emër të firmës, ndërsa kontratën  e sipërmarrjes e ka bërë në emrin e tij jo në emrin e firmës. Deri në këto momente pavarësisht kontratës, kjo kompani nuk ka kaluar në emrin e djalit Ervis Xhelili titullin e pronësisë, pra akoma nuk është pajisur me hipoteke, pasi ajo është e parashikuar në kontratë në një pikë të saj, ku thuhet se për kalimin e pronësisë në emër të porositësit Ervis Xhelili, duhet të lidhet një kontratë tjetër për kalimin e pronësisë mbi apartamentin përpara noterit. Në këto kushte, i pandehuri ka menduar se duke mos pasur një titull pronësie , hipotekën, nuk e kam deklaruar në deklaratën e paraqitur pranë ILDKP-së, për më tepër me këtë kompani akoma nuk janë përfunduar të gjitha punimet më shërbimin që i janë ofruar. Për të provuar faktin që shoqëria T..C... shpk nuk ka pasur një marrëveshje për kryerjen e punimeve me djalin Ervis Xhelilin, janë paraqitur faturat tatimore të shitjes, të subjektit Viklo shpk (me administrator djalin e të pandehurit), për të gjitha punimet e kryera pranë firmës T...C...  shpk, për të vërtetuar edhe një herë faktin se kontrata e sipërmarrjes është lidhur gabimisht në emër të Ervis Xhelilit pasi faktikisht ajo duhet të ishte lidhur në emër të firmës Viklo shpk.

Por, ndërkohë, me procesverbalin e këqyrjes të datës 26.06.2017 është administruar kopje e kontratës së sipërmarrjes datë 18.02.2014, për ndërtimin e apartamentit me sipërfaqe 91.78 m2 ndodhur në plazh kundrejt shumës prej 34 000 eurosh ndërmjet shoqërisë “T...C...” dhe porositësit “Ervis Xhelili”. Në nenin 3 të kontratës thuhet: “1. Shuma totale e apartamentit objekt porosie është 34 000 euro. Pagesa për këtë apartament objekt porosie është bërë si më poshtë: shuma e mësipërme është likuiduar totalisht nga porositësi cash në dorë duke mos pasur asnjë lloj detyrimi ndaj njëri tjetrit. 2. Duke qenë se likuidimet e apartamentit objekt porosie është kryer totalisht nga porositësi tek sipërmarrësi dhe midis tyre nuk ka asnjë detyrim financiar ... ky i fundit i jep të drejtën porositësit që apartamentin objekt porosie ta shesë, ta japë me qira, ta ndërrojë ...” Ndërsa në nenin 4 të kontratës rregullon mënyrën e kalimit të pronësisë pasi të përfundohet apartamenti, veprim i cili do të bëhet me kontratë të veçantë.

Pra, në bazë të kontratës, rezulton se është paguar shuma prej 34.000 euro, gjë e cila nuk është e deklaruar në formularin përkatës.

Ndërkohë, në kallëzimin e ILDKPKI pretendohej se në deklaratën e interesave privatë  “Periodikë/Vjetorë” të vitit 2014 ndër të tjera është deklaruar blerja e një autoveture në vlerën 20 000 euro nga shoqëria “D..A...”. Sipas ILDKPKI kjo marrëveshje është e dyshimtë pasi sipas marrëveshjes bëhet fjalë për kompensim punimesh të kryera.

Nga të dhënat hetimore të Prokurorisë së Dibrës, rezultoi se blerja e këtij automjet është i justifikuar me burime të ligjshme.

Po ashtu, ILDKPKI pretendon në kallëzim se, në emër të djalit të të pandehurit, figuron edhe një apartament në Kashar, Tiranë. Sipas kallëzimit, kjo provohet me faktin se në emrin Ervis Xhelili figuron një kontratë furnizimi me energji elektrike për një apartament në Tiranë.

Nga hetimi i Prokurorisë së Dibrës, rezultoi se nuk bëhej fjalë për të njëjtin shtetas”, - thotë zyrtarisht prokuroria.

(Kosova Sot)