Vulin: Thaçi e përmend ushtrinë sa herë që s’mund t’i shpjegojë ikjet nga Kosova

  • 23 September 2017 - 15:23
Vulin: Thaçi e përmend ushtrinë sa herë që s’mund t’i shpjegojë ikjet nga Kosova

Ministri i Mbrojtjes Aleksander Vulin, ka përsëritur qëndrimet e tij, duke iu kundërpërgjigjur edhe presidentit të Kosovës, Hashim Thaçi, se Kosova s’mund të ketë ushtri të veten.

Hashim Thaçi deklaroi në një intervistë nga New York-u se Kosova s’ka alternativë as plan tjetër pos formimit të ushtrisë, gjë e cila, sipas tij, do të ndodhë deri në fund të këtij viti, por këtë deklarim e kundërshtoi ministri serb Vulin.

I pyetur rreth këtyre deklarimeve të Thaçit, ai pohoi se në Kosovë mund të ketë vetëm një ushtri të armatosur dhe kjo është ushtria e KFOR-it.

Këto qëndrime Vulin ka thënë se i ka prezantuar edhe para personelit të NATO-s, derisa ishte në vizitë atje.

“Ushtria e Kosovës nuk do të formohet në territorin e Kosovës dhe Metohisë, në fushën e kësaj provincës serbe është vetëm një forcë e armatosur, kjo forcë është ajo e KFOR-it”.
Vulin ka shtuar se deklaratat e Thaçit më shumë janë për konsum të brendshëm sesa një politikë reale.

“Sa herë që Thaçi nuk e di se si të shpjegojë papunësinë e lartë në Kosovë, apo pse mijëra qytetarë ikin dhe pse duhet t’i zbatojë dispozitat e marrëveshjes së Brukselit të cilat flasin kundër pavarësisë së Kosovës ai e kujton ushtrinë”.
“Kjo është mënyra e tij për t’u dukur i guximshëm”, ka deklaruar Vulin.

(Kosova Sot)