E fundit nga policia: Vdes edhe gruaja pas plagosjes nga burri i saj që kreu vetëvrasje

Sot rreth orës 12:00 në rrugën “Fitim Duraku”, në Prishtinë si pasojë e gjuajtjes me armë zjarri kanë vdekur dy persona. H.C. mashkull 73 vjeç fillimisht ka shtënë me armë zjarri në drejtim të gruas së tij, Z.C. (femër) 66 vjeç, më pas ka bërë vetëvrasje. Ekipi mjekësor ka konstatuar edhe vdekjen e 66 vjeçares.

Ende nuk dihen motivet që çuan deri te ky rast tragjik.

“Me të dalë në vendin e ngjarjes policia ka hasur në dy persona njëri (mashkull) i vrarë nga arma e zjarrit dhe një (femër) e plagosur, e cila po ashtu ka ndërruar jete pasi që nuk ka arrit të përballoj plagët e shkaktuara nga arma e zjarrit. 

Vdekjen e viktimës H.C. mashkull 73 vjeç, e ka konstatuar ekipi mjekësor në vendin e ngjarjes, ndërkohë që vdekja e viktimës Z.C. (femër) 66  vjeç, është konstatuar nga ekipi  mjekësor në QKUK”, njofton policia.

Bazuar në  hetimin preliminar të kryer nga hetuesit rajonal dhe krimteknika, është ngritur versioni  se fillimisht është plagosur viktima Z.C   nga personi H.C dhe më pas  ky i fundit dyshohet  se ka kryer vetëvrasje me armë zjarri e cila edhe është gjetur në afërsi të tij.

Hetuesit rajonal për hetimin e krimit së bashku me hetuesit policor të stacionit Veriu në Prishtinë,  në koordinim me prokurorinë përkatëse, me një intensitet të shtuar menjëherë kanë filluar ndërmarrjen e një varg  veprimesh hetimore dhe po bëjnë  përpjekje për  të ndriçuar dhe sqaruar të gjitha rrethanat që kanë të bëjnë me rastin.

(Kosova Sot)