Refugjati afgan në Athinë, mësoi greqisht dhe hapi restorant
Një nga vendet më shumë të prekura nga kriza e refugjatëve, Greqia, po përpiqet të ndihmojë klandestinët që fluturojnë drejt shtetit helen.
Mes tyre, shumë emigrantë që kanë mbërritur në Athinë shumë vite më parë, tashmë janë bërë pjesë e shoqërisë greke.
Reza Golami është një prej tyre. Ai është 27 vjeç nga Afganistani. 10 vjet më parë ai arriti t’i shpëtojë luftës dhe të vendoset në Athinë. Ai mësoi greqisht dhe hapi një restorant në qendër të Athinës, duke ofruar shijet e Lindjes së Mesme.
“Kuptova që e vetmja mënyrë për t’u bërë pjesë e shoqërisë, ishte të mësoja gjuhën greke. Dhe ja dola. Ishte e vështirë. Por tani nuk mund të largohem nga Greqia. Si refugjat, mund të shkoj në një vend tjetër por dua të rri këtu” tha Golami.
Golami tha se grekët e ndihmuan dhe ai tani po përpiqet të ndihmojë të tjerët.
“Këta njerëz kanë nevojë për trajtim mjekësor, ushqim, strehë dhe informacion. Dua të bëj për ta, atë çka mundem. I dërgoj në organizata të ndryshme, që mund t’i ndihmojnë për gjithçka” tha Golami.
Edhe mediat lokale sigurojnë shërbime dhe informacione të ndryshme për refugjatët. Zëri i Athinës, përmes edhe gazetës së përjavshme, ndihmon me informacione refugjatët dhe emigrantët. Kontribuon me 4 faqe të gazetës.
Fluksi i refugjatëve dhe emigrantëve ilegalë drejt Evropës nuk është një fenomen i ri dhe për 2015 shifrat janë vërtet të frikshme, sidomos për Greqine.
