Berisha: Jam për opozitë të ndryshme nga Basha!

Themeluesi i Partisë Demokratike dhe njeriu që e drejtoi atë për 22 vjet, Sali Berisha, ka sqaruar dje në një intervistë për ABC News se alternativa e tij opozitare dallon nga ajo e Lulzim Bashës dhe vijës zyrtare të Partisë Demokratike. Berisha i ka dhënë fund dilemave, ai ka sqaruar se Basha është kandidat për Kryeministër, ndërsa ai e ka mbyllur tashmë këtë kapitull. Berisha ka sqaruar më tej se opozita po jep mjaft alternativa në vend, por ai vetë, është për revolucion demokratik dhe mosbidje civile. Këto janë përgjigjet e plota të Berishës që qëndrimin e tij dhe të PD në raport me alternativat e opozitës:

Në qoftë se ju thoni se njerëzit duhet të armatosen për këtë situatë që ju paraqisni, do të thotë që opozita nuk ka alternativë tjetër, por ka nevojë që qytetarët të marrin armët dhe të vetëmbrohen?

Berisha: Opozita nuk ka këtë alternativë. E thashë edhe njëherë, kjo është alternativa ime. Sepse ka një dallim thelbësor mes meje dhe Lul Bashës. Lul Basha është përfaqësuesi i opozitës kandidat për kryeministër, kurse Sali Berisha e ka mbyllur kapitullin…

Ju jeni zëri i opozitës në parlament z.Berisha…

Berisha: Jo. Jam por jo i alternativës opozitare. Alternativën opozitare e paraqet kryetari I PD. Po të jetë për alternativë timen, revolucion demokratik. Unë e kam thënë me kohë. Doja 5 mijë, 10 mijë vetë të nguleshim në bulevard dhe ta rrëzonim Edi Ramën. Por kjo nuk është e PD-së, kjo është e imja.

A mendoni se kjo çështje kërkon një vendimmarrje shumë më të madhe sesa ju, PD-ja, 140 deputetë në parlament?

Berisha: Unë mendoj se kjo çështje…Edhe njëherë të dal tek kryetari dhe tek PD-ja. PD-ja nuk mund ta ketë këtë alternativë sepse PD-ja kur drejtohej nga unë kishte 0 tolerancë ndaj krimit. Unë besoj se edhe z.Basha do I përmbahet këtij parimi që presin qytetarët. Kurse unë, unë jam një deputet tani. Nuk përfaqësoj udhëheqjen e PD. Natyrisht unë jap mendimet e mia, siç jap për revolucionin demokratik, me të gjitha mjetet e mosbindjes paqësore. Unë jap këtë një alternativë.

(Kosova Sot)