Drenasi voton, por nuk fiton!
hkruan: Forim Zeqa
Zgjedhjet e imponuara në Drenas janë përcjellë me skenarin për ruajtjen e vazhdimësisë qeverisëse në këtë komunë dhe një testim i lehtë subjekteve politike, në prag të hyrjes në vitin e ngjeshur zgjedhor. Pavarësisht numrit të daljes së votuesve në këto zgjedhje, në temperatura të ulëta dimri, fushata zgjedhore nxori në sipërfaqe të njëjtat slogane dhe premtime, të njëjtat kritika dhe akuza të ndërsjella mes kundërshtarëve politikë. U premtuan miliona euro dhe mijëra vende pune, ndërtime shkollash dhe objekte tjera, investime në infrastrukturën rrugore, kanalizime, ujësjellës, etj. Mirëpo logjikisht rrjedh konstatimi, se kryetari i ri, edhe sikurse të kishte në dorë tërë buxhetin e shtetit, nuk do të ketë kohë për realizimin e pothuajse të asnjë projekti madhor brenda një viti, kur dihen procedurat burokratike që ekzistojnë në vendin tonë.
S'ka hapësirë kohore për të bërë shumë Pavarësisht se cili kandidat i merr votat për kryetar, Drenasi edhe pas këtyre zgjedhjeve të jashtëzakonshme do të mbetet në të njëjtat nivele të zhvillimit deri në fundin e mandatit, më pak se njëvjeçar të kryetarit të ri. Pra, do vazhdojë të mbetet njëra nga komunat më të varfra në shtetin e varfër, të drejtuar nga oligarkët milionerë dhe multimilionerë të pasluftës në Kosovë. Bazuar në faktin që KQZ-ja (e ndikuar nga pushtetarët aktualë) nuk e pranoi monitorimin e këtyre zgjedhjeve nga OSBE-ja, dyshohet në një proces të montuar zgjedhor, i cili do të ruajë vazhdimësinë e qeverisjes së PDK-së në Drenas. Zgjedhjet në vitin e fundit të mandatit politik në komunën e Drenasit s'janë gjë tjetër veçse një testim i radhës dhe një stërvitje e lehtë e partive politike në prag të hyrjes në vitin e ngjeshur zgjedhor.
Habere jo të mira nga Holanda Njoftimi që erdhi nga Holanda, që Ligji për veprimin e Gjykatës Speciale në këtë shtet të hyjë në fuqi nga 1 janari 2017, është një lajm jo fort i këndshëm për vendin tonë. Ky përafrim i veprimit të "Speciales" mund të ndikojë që vendi ynë të rrëshqasë në trazira të paparashikuara nga të inkriminuarit e skenës politike. E 2017-ta mund të jetë viti i mbajtjes së zgjedhjeve të përgjithshme në Kosovë, si pasojë e fillimit të punës së Gjykatës Speciale. Në këtë rast, Qeveria dhe Parlamenti që i dhanë "bekimin" fillimit të punës së kësaj gjykate shumë shpejt do të ndodhen para sfidave të tepër të vështira,...andaj medoemos duhet të përgatisin strategjinë e veprimit, se si të procedohet tutje pas fillimit të arrestimeve të para,...ngase shumë komuna në Kosovë mund të mbesin pa kryetar, Qeveria pa ministra apo zv.ministra dhe Parlamenti pa një pjesë të konsiderueshme të deputetëve të pozitës dhe opozitës. Zgjedhjet nga muaji në muaj nuk janë zgjidhje, andaj duhet gjetur mënyrat më të mira për të parandaluar trazirat e mundshme dhe funksionalitetin e jetës institucionale në Kosovë. Në vend të zgjedhjeve të shpeshta (mujore) nëpër komuna, duhet që puna të vazhdojë me ushtrues detyre deri ne afatin e rregullt zgjedhor, e jo të veprohet sikurse në Drenas, edhe pse më pak se një vit deri në fund të mandatit padrejtësisht e dërguan në zgjedhje, duke maltretuar panevojshëm qytetarët dhe dëmtuar buxhetin e shtetit për miliona euro,...përderisa për të njëjtat motive komunën e Skenderajt e "lejuan" të funksionojë tani e tre vjet pa kryetar.
Vendin e presin zgjedhje të reja në vitin 2017 Kështu ndodh në vendin e paradokseve të quajtur Kosovë, ku ligjin e diktojnë të fortët e politikës, qofshin në pushtet apo prapa grilave! Bazuar në rrjedhat politike pas fillimit të punës së Gjykatë Speciale, mund të ndodhë që së largu kah mesi i vitit 2017 vendi të shkojë në zgjedhje të përgjithshme, nacionale dhe lokale, për të plotësuar vakumin institucional, si pasojë e ndërrimit të vendbanimit të disa prej personaliteteve të larta shtetërore, përfshirë ministra, zv. ministra dhe kryetar komunash. Pavarësisht veprimeve të Gjykatës Speciale dhe pasojat e saj në skenën politike dhe qeverisjen e vendit, ka ardhur koha për ndryshime substanciale në vendin tonë. 17 vjet ishin shumë të gjatë për pjesën dërmuese të popullatës, që jetën e kaloi në varfëri, të rënda dhe të mundimshme na dolën të ishin edhe afro nëntë vjet pavarësi, ku shteti i ri "për dikë u bë nënë e për dikë tjetër njerkë", dikush i gëzon të gjitha privilegjet nga shteti, e dikush tjetër asgjë. Si pasojë e kësaj situate, Kosova ndodhet në prag të shpërthimit të "bombës sociale", të cilët me padurim e presin armiqtë e shtetit tonë, përderisa ndërkombëtarët me kureshtje i përcjellin të gjitha zhvillimet dramatike në vendin tonë, për të arsyetuar vazhdimësinë e prezencës së tyre në Kosovë.
(Kosova Sot)
