Mbështetja për Ramushin dhe të vërtetat e saj! - Opinione - Kosova Sot
Mbėshtetja pėr Ramushin dhe tė vėrtetat e saj!

Mbėshtetja pėr Ramushin dhe tė vėrtetat e saj!

Shkruan: Florim Zeqa

Është lehtë të lexohet (jo)sinqeriteti në fytyrat e njerëzve!

Në asnjë rrethanë, deklarimet individuale nuk paraqesin rrezik për grupet etnike joshqiptare në Kosovë. Andaj, tendenca e krerëve shtetërorë për shkelje të Rezolutës së Kuvendit, për nxitje të dialogut me Serbinë në Bruksel pa lirimin dhe kthimin e Ramush Haradinajt në Kosovë, nuk mund të arsyetohet me asnjë lloj logjike, përveç asaj të nënshtrimit dhe vasalitetit ndaj Beogradit dhe Brukselit

Colmari i Francës, përgjatë këtyre tre muajve të fundit u bë epiqendër e vëmendjes së shumicës së shqiptarëve të Kosovës. Këtij qyteti mesatar francez, për të mos thënë çdoorë e çdo ditë, në çdo vikend dhe në çdo seancë gjyqësore ia mësyn me qindra shqiptarë nga Diaspora dhe trojet etnike shqiptare. Në mesin e atyre që e vizituan Ramush Haradinajn, përveçse bashkëpartiakë dhe mbështetës të flaktë të tij, kishte edhe bashkatdhetarë të bindjeve të ndryshme politike, fetare apo ideologjike, që kaluan me qindra e mijëra kilometra rrugë për t'u takuar dhe shprehur solidarizimin me Ramush Haradinajn, pengun e politikës vendore dhe ndërkombëtare. Por, kishte edhe të atillë, që në Colmar të Francës shkuan në shenjë falënderimi dhe respekti për veprimet e guximshme të Haradinajt të para 11 viteve me rastin e ceremonisë së varrimit të presidentit historik Ibrahim Rugova, ku falë Ramush Haradinajt, presidenti u varros me nderime të larta shtetërore nga Garda e TMK-së. Në Colmar te Ramushi shkuan edhe biznesmenë dhe pseudo-patriotë të profileve të ndryshme për interesa personale, sa për të zënë ndonjë argat te Ramushi, me shpresën, që ai nesër do t'ua kthejë si shpërblim (kur të vijë në pushtet) me ndonjë tender apo sihariq tjetër.

Krerët shtetërorë, punët e vogla e fjalët e mëdha!

Ata që nuk shkuan fare të Ramushi në Colmar ishin liderët shtetërorë, të cilët u mjaftuan me deklarata stereotipe: "Arrestimi i Ramush Haradinajt me urdhërarrest të Serbisë është i papranueshëm". Deklarata këto sa për t'i hedhur pluhur syve opinionit tonë, se ndalesa e Ramushit i paska pikëlluar thellë dhe se këta do bëjnë çmos për lirimin e tij sa më të shpejtë, e në fakt mezi presin që Ramushin ta ekstradojnë për në Serbi. Deri tek ky anashkalim ka ardhur si rezultat i një lidershipi të papërgjegjshëm, një klase politike të uritur për pushtet dhe neglizhencës së institucioneve përkatëse shtetërore, të cilat për këto 18 vite nuk qenë në gjendje të ngrisin qoftë edhe një padi të vetme ndaj shtetit serb. Rezoluta e miratuar në Kuvendin e Kosovës, në fillim të muajit mars, përmes së cilës kërkohet pezullimi i dialogut me Serbinë deri në lirimin e Ramush Haradinajt nga autoritetet franceze, duhet të jetë obligim ligjor edhe për presidentin, kryeministrin dhe kabinetin qeveritar. Në asnjë rrethanë, deklarimet individuale nuk paraqesin rrezik për grupet etnike joshqiptare në Kosovë. Andaj tendenca e krerëve shtetërorë për shkelje të Rezolutës së Kuvendit, për nxitje të dialogut me Serbinë në Bruksel pa lirimin dhe kthimin e Ramush Haradinajt në Kosovë nuk mund të arsyetohet me asnjë lloj logjike, përveç asaj të nënshtrimit dhe vasalitetit ndaj Beogradit dhe Brukselit.
Çështja e ndalimit të Ramushit është rast unikat

Përfundimisht, liderët shtetërorë duhet të respektojnë unitetin e subjekteve politike në parlament, gjegjësisht Rezolutën e miratuar nga të gjitha grupet parlamentare shqiptare dhe joserbe në Kuvend. Në të kundërtën, do ta marrin etiketën e përçarësve fatalë të skenës politike kosovare. Çështja e ndalimit të Ramushit është rast unikat, dhe për lirimin e tij duhet të argumentohet me fakte pafajësia e tij e jo me deklarata boshe, sepse gjyqet e botës së civilizuar nuk pranojnë fjalë boshe e retorika politike me folklorizëm, por dokumente. Andaj liderët shtetërorë në koordinim me Kuvendin e Kosovës është dashur nga fillimi të sigurojnë ekspertë ndërkombëtarë dhe vendorë për përpilimin e dokumenteve e fakteve të bollshme për mbrojtjen e Ramushit e jo të shesin patriotizëm të përzier me folklorizëm,...ngase kështu bota demokratike dhe drejtësia ndërkombëtare nuk do të bindet asnjëherë me punët e vogla dhe fjalët e mëdha të liderëve shtetërorë të Kosovës. Të gjithë ata që janë angazhuar me shpirt e zemër, pas lirimit të Ramush Haradinajt kanë arsye të ndihen krenarë, sikurse që, të gjithë ata që kanë bërë maskarada mashtruese, qoftë përmes deklaratave false apo protestimeve jo të sinqerta, duke u paraqitur si "mbrojtës" në njërën anë, ndërsa në prapaskenë duke e sharë dhe akuzuar duhet të ndihen të turpëruar. Është lehtë të lexohet (jo)sinqeriteti në fytyrat e njerëzve!

(Kosova Sot)

4 orë e 30 minuta më parë