Rugovizmi mbrohet me vepra e jo me fjalë - Opinione - Kosova Sot
Rugovizmi mbrohet me vepra e jo me fjalė

Rugovizmi mbrohet me vepra e jo me fjalė

Fjalëve dhe hipokrizisë politike më nuk u beson askush

 SHKRUAN: FLORIM ZEQA 

Mbetet i pajustifikueshëm fakt, pse rrahagjoksët e rugovizmit, për 10 vjet në shtetin e pavarur, shtatë prej tyre në qeverisjen e vendit nuk arritën të zbulojnë asnjë rast të vetëm të vrasjeve të veprimtarëve të LDK-së, gjegjësisht bashkëpunëtorëve të ngushtë të tyre!

Mbetet i pajustifikueshëm fakt, pse rrahagjoksët e rugovizmit, për 10 vjet në shtetin e pavarur, shtatë prej tyre në qeverisjen e vendit nuk arritën të zbulojnë asnjë rast të vetëm të vrasjeve të veprimtarëve të LDK-së, gjegjësisht bashkëpunëtorëve të ngushtë të tyre! "Po fjete në një shtrat me fëmijë, në mëngjes zgjohesh i lagur" (popullore)". Bazuar nga kjo thënie popullore, ata që qëndruan për afro shtat vite në qeverisje me kapësit dhe rrënuesit e shtetit nuk kanë të drejtë të flasin për pastërtinë e tyre politike. Të flesh për shtat vjet në shtratin e korrupsionit dhe krimit të organizuar dhe të flasësh për moral politik, përveçse hipokrizi politike është edhe dyfytyrësi njerëzore. Ata që para çdo lidhje të kurorës qeverisëse me uzurpatorët e shtetit premtonin ndryshimin e simboleve shtetërore (flamurin dardan) dhe zbardhjen e vrasjes së veprimtarëve të LDK-së, me ardhjen në pushtet i harruan të gjitha, e harruan gjakun e bashkëpartiakëve dhe premtimin e dhënë para elektoratit rugovian. Përgjatë qeverisjes së vendit të mbash në duar dy ministritë kyçe; Ministrinë e Drejtësisë dhe atë të Punëve të Brendshme, së fundmi edhe kryeministrinë dhe të mos arrish asnjë rezultat në zbardhjen vrasjeve të veprimtarëve më të devotshëm të LDK-së dhe çështjes kombëtare, është turp dhe tradhti ndaj elektoratit, me votën e të cilit u akomoduan në majat e pushtetit.

Mungesa e guximit për të kërkuar të vërtetën

Paturpësia bëhet akoma më e madhe kur menjëherë pas humbjes së pushtetit u kërkohet llogari pushtetarëve të rinj (vjetër) për zbardhjen e vrasjeve të veprimtarëve të LDK-së! Kjo përveçse debolencës, paraqet mungesën e guximit për të kërkuar të vërtetën, si e drejtë legjitime dhe e pakontestuar nga ligjet e shtetit dhe universit. Shembullin më të mirë se si kërkohet e vërteta dhe zbulohen prapaskenat e urdhërdhënësve të vrasjeve të pasluftës, lexuesve të këtij shkrimi do ua ilustroj me një shembull personal. "Me 23 qershor 2013, në një aktivitet tradicional multietnik në Giavera del Montello (TV)-Itali ndodhi një akt i sulmit fizik ndaj flamurit dardan, të vendosur nga ana ime në tendën e përbashkët shqiptare në këtë aktivitet. Përveçse e pengova ekzekutorin e këtij akti monstruoz në heqjen e flamurit dardan, e detyrova aty për aty të bëjë edhe kërkimfaljen. Mirëpo për mua mbeti mister i pazbuluar kush ishte urdhërdhënësi!? Meqenëse dyshimet e bazuara i kisha të një person i vetëm, megjithatë ishin edhe disa elemente që e bënin të paqartë situatën. Për të mos u zgjatur shumë rreth kësaj historie të gjatë, më është dashur punë intensive dhe bashkëpunim (kundër dëshirës time) me ekzekutorin (sulmuesin e flamurit) derisa e kam sjell në situatë që të e thotë me gojën vet emrin e urdhërdhënësit. Ky ishte edhe momenti që shënon fundin e bashkëpunimit me ekzekutorin. 

PËRGJATË QEVERISJES SË VENDIT, LDK-JA KA MBAJTUR DY MINISTRI KYÇE

Pushtetin e shfrytëzuan vetëm për interesat e tyre personale

Edhe pse shumë nga shqiptarët në Provincën e Trevizos e më gjerë e dinë emrin e këtij urdhërdhënësi dhe ekzekutorit për heqjen e flamurit dardan në këtë aktivitet multietnik, kësaj radhe nuk do e bëj publik emrin e urdhërdhënësit dhe as ekzekutorit". Kur rrahagjoksët e rugovizmit në LDK ta zbardhin vetëm njërin nga qindra e mijëra raste të sulmeve dhe vrasjeve të veprimtarëve të LDK-së, atëherë edhe unë do t'i bëjë publik emrat e këtyre dy krimbave të vegjël. Le të shërbej ky shembull imi personal për rrahagjoksët e frymës rugoviane në LDK, se për të ardhur deri tek e vërteta nuk është punë aspak e lehtë, por nuk është edhe e pamundur! Me vullnet, përkushtim, guxim qytetar dhe respekt ndaj bashkëpunëtorëve dhe besnikëri ndaj filozofisë politike në të cilën thirresh dhe merr obligime para elektoratit nuk duhet heshtur dhe as pushuar për asnjë çast deri në çuarjen në vend të premtimit të dhënë para vetvetes apo të tjerëve. Mbetet i pajustifikueshëm fakti, pse rrahagjoksët e rugovizmit, për 10 vjet në shtetin e pavarur, shtatë prej tyre në qeverisjen e vendit nuk arritën të zbulojnë asnjë rast të vetëm të vrasjeve të veprimtarëve të LDK-së, gjegjësisht bashkëpunëtorëve të ngushtë të tyre! Kjo po e vërteton faktin, se këta rrahagjoksët e frymës rugoviane pushtetin e shfrytëzuan vetëm për interesat e tyre personale, asnjëherë nuk u morën me problemet e qytetarëve, e më së paku me zbardhjen e vrasjes së bashkëpartiakëve të tyre. Fjalëve dhe hipokrizisë politike më nuk u beson askush, rugovizmi mbrohet me vepra e jo me fjalë! 

(Kosova Sot)

 

9 orë e 12 minuta më parë
19/02/18