Spektakli i radhës
Shkruan Faton Mehmeti
Edhe si shumë herë të tjera, Policia e EULEX-it së bashku me Policinë e Kosovës, herë ndaras e herë së bashku, dje herët vazhduan spektaklin medial, gjoja për arrestimin e një grupi të madh të organizuar kriminal, rreth 40 të dyshuar. Skenari i organizuar kinse për të luftuar krimin dhe njerëzit e përfshirë në të ngërthen në vete absurditetin e saj sa komik aq edhe tragjik, një drame së cilës i mungon personazhi i saj kryesor.
Azem Syla prej kohësh përflitet si ndër njerëzit e përshirë në krim dhe korrupsion, emri i tij lakohej nëpër media dhe në biseda private, ndonëse të pakët ishin ata që merrnin guximin ta shqiptonin emrin e tij. Për rastin në fjalë thuhet se hetimi ka të bëjë me një grup të madh të organizuar kriminal, i cili ka qenë aktiv nga viti 2006 e deri më sot, i përbërë nga qytetarë nga Kosova dhe nga Serbia, i kryesuar nga Azem Syla.
Korrelacioni në mes të politikës dhe drejtësisë
Me këtë rast vihet në dukje dështimi i Prokurorisë, e cila pas dhjetë vjetësh arriti të zbulojë veprimtarinë e këtij grupi, si dhe dështimi tjetër pasohet nga policia, e cila ka dështuar të arrestojë të dyshuarin kryesor, Azem Sylën. Për më tepër përpjekjet e vazhdueshme të Policisë së Kosovës gjatë dhjetë ditëve të fundit për ta përcaktuar vendndodhjen e kanë rezultuar të dështuara. Në çdo vend të botës, kur një person është i dyshuar për veprimtari kriminale, ai mbahet nën vëzhgim nga organet shtetërore, për t'ia pamundësuar arratisjen.
Arratisja e Azem Sylës, si edhe e ish-kryetarit të Kaçanikut, Xhabir Zharkut, zbërthejnë më së miri korrelacionin në mes politikës dhe drejtësisë, politika e udhëheq drejtësinë në këtë vend. Krimi dhe korrupsioni nuk luftohen derisa drejtësia diktohet nga politika, e politika mbron njerëzit e saj nga drejtësia, duke ua hapur atyre dyert e arratisjes, prandaj njerëz të krimit preferojnë t'i shërbejnë politikës në mënyrë që të përfitojnë imunitet prej saj. Politika prej kohësh ka tërhequr vëmendjen e krimit dhe kjo e dëmton demokracinë, që aspiron shoqëria jonë. Lufta ndaj tij duhet të zhvillohet çdo ditë, por jo me spektakël medial, por me një strategji të qartë, për të arritur rezultatet e dëshiruara nga shoqëria jonë. Ne shumë herë zgjedhim të bashkëjetojmë me këtë të keqe, pa pasur kurajën për ta luftuar atë, se politika jonë nuk mbjell shpresë, por krijon konflikte artificiale.
Flirti me politikën
Shumë intelektualë të ndershëm, që do t'i bënin nder vendit, nëse do të uleshin në karriget e merituara, janë penguar ose kanë braktisur karrierën e tyre në politikë. Kjo rrymë e pistë dhe e fortë i ka nxjerrë ata nga politika. Ka ardhur koha që kësaj pjese të kalbur të shoqërisë, t'i grisen maskat dhe të përfundojë në burg. Përderisa individë të caktuar nga organet e gjyqësisë dhe ato të prokurorisë vazhdojnë të flirtojnë me politikën, nuk ka shpresë, por as besim, se do të minimizohet shkalla e lartë e korrupsionit dhe krimit të organizuar në vend.
Shteti duhet të tregohet më i vendosur përballë së keqes, së pari duke ndërtuar një sistem të qëndrueshëm të së drejtës. Azem Syla e Xhabir Zharku janë rezultat i një sistemi të mbrapshtë qeverisës, ku krimi kontrollon çdo gjë, ndaj dhe është pak e besueshme se në këtë vend po fillon të vihet drejtësia, pasi sistemi është i kontrolluar nga krimi. Derisa ky sistem vazhdon të Qeverisë këtë vend, do shohim më tepër spektakël e më pak drejtësi…
