Mbështetje e fuqishme për personalitete me dinjitet kombëtar

Shkruan: Prof.dr. Eshref Ymeri

Më ka lënë mbresa të thella analiza me titull “Thirrje për ndërgjegjësim e veprim: Të mbështetet vizioni i Znj. Osmani për çmontimin e korrupsionit dhe shtetit privat e tribal”, e botuar në internet më 27 nëntor 2020. Autor i kësaj analize, të cilën e pata hedhur në rojtinën e kompjuterit tim, është zotëria i nderuar Skënder Kapiti, analist mendjehollë, historian erudit, jurist gjakftohtë, opinionist mendjekthjellët, politolog largpamës, studiues objektiv, veteran i Ushtrisë Çlirimtare të Kosovës.

Autori ngre zërin e tij të fuqishëm kundër fatkeqësisë që ka goditur Republikën e Kosovës, në të cilën korrupsioni i përmasave skandaloze i kastës politike antikombëtare, me në krye Thaçin deri dje dhe bandën rreth tij sot, ka goditur rëndë standardin e jetesës së shumicës dërrmuese të popullit, çka ka bërë që qindra mijëra qytetarë, ashtu si edhe në atdheun amë nën sundimin e kastës po antikombëtare të Ramës, të braktisin atdheun dhe të marrin rrugët e mërgimit.

Ajo që të bën përshtypje të thellë në këtë analizë, është alarmi që ngre autori i nderuar për ndërgjegjësimin e popullit shqiptar të Kosovës, për t’u shkundur nga letargjia politike dhe për ta parë në sy realitetin tragjik, sepse kasta politike nepotiste e deritanishme e ka shndërruar vendin në një shtet privat të përmasave tribaliste. Sepse gjithçka në Kosovë, siç thekson me shumë shqetësim autori, duke filluar që nga detyrat e larta shtetërore dhe administrative, deri te pasuritë kombëtare, paraja publike, ligji dhe drejtësia, janë nën zotërimin absolut të kësaj kaste grabitësish të pangopur.

Administrata e rënduar shtetërore është një barrë e rëndë në kurriz të popullit të varfëruar në maksimum.

Në këto kushte të papërballueshme për jetesën e popullit, analisti Skënder Kapiti nxjerr në pah figurën e intelektuales së shquar Vjosa Osmani, e cila e ka drejtuar Kuvendin me shumë maturi politike, dhe tani, që është edhe në detyrën e Presidentes së Republikës, ia ka kthyer autoritetin Presidencës së Republikës, Presidencë, të cilën argati i serbosllavizmit Hashim Thaçi, e kishte shndërruar në një zyrë private, prej nga vepronte sipas tekave të veta, merrte vendime dhe lëshonte urdhra vetëm për interesat e shovinizmit serbomadh.

Mendoj se është fat i madh për Republikën e Kosovës, nga radhët e intelektualëve të së cilës, tamam si një rreze drite në fund të një tuneli të errët, dallohet personaliteti i Vjosa Osmanit. Analisti Skënder Kapiti, në fugurën e Vjosa Osmanit shikon një politikane me një formim intelektual mjaft të admirueshëm, me një edukatë qytetare shembullore, me një vetëdije të lartë kombëtare dhe me një vizion nacionalist model, ashtu si edhe ish-kryeministri Albin Kurti. Pikërisht këto tipare të Vjosa Osmanit që ka nxjerrë në pah autori i kësaj analize, të ngjallin shumë shpresa se në Kosovë, siç e ka theksuar me shumë të drejtë intelektuali nacionalist Hafiz Shala me banim në Nju Jork, orteku i pastrimit të bërllokut politik do të fillojë të rendë teposhtë me një furi të papërballueshme.

Në këto kushte, Vjosa Osmani dhe Albin Kurti kanë nevojë për përkrahjen e gjithanshme të shtresës së intelektualëve me vetëdije të lartë kombëtare. Mbështetja e fuqishme që analisti Skëndet Kapiti i jep Vjosa Osmanit, si një intelektuale dhe politikane e pakorruptuar dhe me sjellje shembullore, le të shërbejë si model për intelektualët e tjerë të Republikës së Kosovës. Këta intelektualë, duke ndjekur shembullin e analistit Skënder Kapioti, duhet të bëhen mbështetje e fuqishme e Vjosa Osmanit dhe e Albin Kurtit, në mënyrë që nesër, pas zgjedhjeve të parakohshme, qeveria e re, me këto dy personalitete në krye të vendit, të vërë në jetë programin e ish-qeverisë Kurti, në të cilin shtroheshin dy objektiva themelore: sekuestrimi i të gjitha pasurive të paligjshme dhe ngritja e padisë kundë Serbisë për gjenocidin e egër dhe shkatërrimet e rënda që pati kryer në Kosovë, duke kërkuar kompensimin e plotë të tyre

Vjosa dhe Albini duhet të kenë parasysh se intelektualët me brumosje nacionaliste që janë në përkrahje të tyre, si analisti shembullor Skënder Kapiti, shërbejnë si rripa transmisioni midis udhëheqjes së vendit dhe masës së gjerë të qytetarëve të thjeshtë. Prandaj këta intelektualë shembullorë duhet të gëzojnë tërë respketin dhe përkrahjen morale të Vjosës dhe Albinit që gjatë fushatës zgjedhore dhe pas saj, deri në vazhdimësi.

I kam ndjekur rregullisht në internet analizat e intelektualit Skënder Kapiti, të cilat ia ka kushtuar Vjosës këta muajt e fundit. Me sa jam në dijeni, deri tani ai i ka kushtuar asaj rreth 20 ose 30 artikujt-analiza dhe besoj se ajo duhet ta ketë falënderuar për këtë mbështetje të fuqishme që i ka thënë në truallin e veprimtarisë së saj politike, e cila, në këndvështrimin tim, ka nj rëndësi të jashtëzakoshme jo vetëm për Republikën e Kosovës, por edhe për mbarë kombin shqiptar. Sepse fara e politikës me nerv nacionalist, atdhetar, që kanë mbjellë Vjosa dhe Albini në Republikën e Kosovës, është me rëndësi mbarëkombëtare, me shpresë që ajo farë të hedhë rrënjë dhe të lëshoj shtat edhe në atdheun amë dhe në mbarë trojet tona etnike. Them besoj se Vjosa duhet ta ketë falënderuar analistin e nderuar Skënder Kapiti, sepse prej tij ajo ka huazuar dhe po e përdor parullën mjaft kuptimplote “Guxo!” për formacionin e vet politik.

Mbështetja e fuqishme e Vjosës dhe Albinit nga ana e shtresës së intelektualëve të formatit nacionalist të analistit Skënder Kapiti, të cilët duhet të propozohen edhe si kandidatë për deputetë, do të shërbejë si një garanci e sigurt për vënien në jetë të dy pikave të lartpërmendura të programit qeverisës, si edhe për vënien përfundimtare të Veriut të Mitrovicës nën administrimin e Prishtinës, për rikthimin e 14 500 banorëve të saj në shtëpitë dhe pronat e tyre, të cilët kryetradhtarët Thaçi dhe Veseli i patën shpërngulur paturpësisht dhe patën lejuar importimin e serbëve për t’i zënë ato shtëpi dhe ato prona. Prandaj serbët e importuar duhet të kthehen andej nga kanë ardhur.

Ventura, Kaliforni

09 dhjetor 2020

Shkrimet në këtë rubrikë nuk shprehin qëndrimet e gazetës "Kosova Sot Online".