Chiellini: Me Ronaldon, Juventusi po i tejkalon limitet
Giorgio Chiellini e ka lartësuar Cristiano Ronaldon për plotësimin e boshllëkut të lënë nga largimi i Gianluigi Buffonit dhe për ndihmesën që i ka dhënë Juventusit t’i tejkalojë limitet.
Në një intervistë me të përditshmen spanjolle, Marca, Chiellini foli edhe për ndikimin e Cristiano Ronaldos në skuadrën bardhezi dhe për Ligën e Kampionëve.
“Po punojmë për ta fituar Ligën e Kampionëve”, tha qendërmbrojtësi italian për gazetën spanjolle një ditë para ndeshjes së Juventusit kundër Atletico Madridit në 1/8 e finales së Ligës së Kampionëve.
“[Liga e Kampionëve] është objektivi ynë, edhe pse e komplikuar. Shorti na e përcaktoi një ekip që është shumë i ngjashëm me tonin”, shtoi ai.
Ai tha se ardhja e Ronaldos në Juve ka qenë shumë e rëndësishme për kampionin italian.
“Ardhja e Ronaldos ishte e rëndësishme. Sa i përket karakterit, ai e ka mbushur boshllëkun e lënë nga largimi i Buffonit. Vetëm një budalla do të dyshonte në aftësitë e tij për të shënuar gola dhe për të dhënë asiste”, theksoi Chiellini.
“Pasi kemi dominuar në Itali për kaq shumë vite, është normale të mendosh se ne e kemi arritur kulmin, por falë Ronaldos ne i kemi tejkaluar limitet”, këmbënguli ai.
(Kosova Sot)