BESIANA MEHMEDI NË TIRANË NË ROLIN E NËNËS SHQIPTARE NË OPERËN 'GOCA E KAÇANIKUT'
Sot, më 25 Nëntor, Ora: 19:00 skena e Operës dhe Baletit në Tiranë do të mirëpresë një ngjarje historike – shfaqjen e operës së parë kombëtare kosovare, “Goca e Kaçanikut”. Kjo kryevepër, e kompozuar nga Akademiku Rauf Dhomi dhe me libreto nga Ajmone Dhomi dhe Jusuf Buxhovi, i rikthen publikut shqiptar një traditë të munguar prej më shumë se gjysmë shekulli, transmeton gazeta “Kosova Sot Online”..
Me krenari të veçantë, dua të theksoj rolin e bashkëshortes sime, Prof. Besiana Mehmedi, e cila do të interpretojë figurën e Plakës – Nënës Shqiptare. Ky rol, i mbushur me simbolikë dhe fisnikëri, përfaqëson të gjitha gratë shqiptare që ndër shekuj kanë mishëruar forcën, dashurinë dhe sakrificën për familjen dhe atdheun.
E realizuar nën regjinë e mjeshtrit të njohur Nikolin Gurakuqi dhe dirigjimin e talentuarit Edon Ramadani, kjo oper bashkon mbi 100 artistë – solistë, kor dhe orkestër – në një prodhim të jashtëzakonshëm që sfidon kohën dhe krijon një urë të re bashkëpunimi kulturor mes Kosovës dhe Shqipërisë.
“Goca e Kaçanikut” është më shumë se një vepër artistike; ajo është një testament i fuqisë dhe qëndresës sonë kombëtare. Prania e Besianës në këtë produksion jo vetëm që nderon këtë trashëgimi, por edhe kontribuon në ngritjen e mëtejshme të vlerave tona artistike në skenën mbarëkombëtare.
Si bashkëshort dhe admirues i punës së saj, ndjej krenari të jashtëzakonshme për përkushtimin e saj ndaj artit dhe për kontributin që ajo jep në ruajtjen dhe promovimin e identitetit tonë kulturor.
Le të mbështesim këtë moment të rëndësishëm dhe të festojmë së bashku suksesin e operës shqiptare dhe artit tonë kombëtar!
Me respekt të lartë, Shkodran Tolaj
(Kosova Sot Online)
