Tetori, muaji i mbjelljes së drunjve dekorativ në Gjilan - Lajme - Kosova Sot
Tetori, muaji i mbjelljes së drunjve dekorativ në Gjilan

Tetori, muaji i mbjelljes së drunjve dekorativ në Gjilan

Komuna e Gjilanit, ka shpallur tetorin muaj të mbjelljes së drunjve dekorativ në hapësira publike, parqe, oborre të institucioneve, lagje e fshatra të ndryshme, në kuadër të aksionit “Ta pastrojmë Kosovën-Gjilanin”, me ç’rast ftohen të gjitha institucionet, kompanitë e ndryshme, komuniteti, që të mbjellin drunj dekorativ në gjithë territorin e Gjilanit.

Kështu është thënë sot në mbledhjen e grupit punues për pastrimin, gjelbrimin dhe ruajtjen e ambientit, ku kryetari i Komunës, Lutfi Haziri, ka kaërkaur që të përgatitet plan i detajuar për muajin tetor dhe nëntor për pastrim, gjelbrim dhe vetëdijësim.

Haziri në fjalën e tij ka falënderuar ekipet të cilat kanë kontribuar në pastrimin e ambientit, kompanitë e ndryshme, shkollat, institucionet shëndetësore, bashkësitë fetare, shoqërinë civile, të rinjtë, por edhe këshillat e fshatrave e lagjeve dhe të gjithë ata që kanë dhënë kontribut që të pastrohet ambient.

“Falënderoj të gjithë ata që janë angazhuar në këtë aksion të madh. Të gjitha institucionet dhe përfaqësuesit e shumtë deri te individët nëpër lagje e fshatra. Deri në javën e ardhshme, nga ekspertët do të caktohet lokacioni për mbeturinat e ngurta-inerte, për të vazhduar pastaj me largimin e deponive ilegale të cilat janë të evidentuara”, ka thënë kryetari Haziri.

“Po përgatitemi edhe për periudhën 12 deri 22 nëntor, kur në Gjilan kompanitë e kontraktuara nga Qeveria së bashku me ato gjilanase do të bëjnë largimin e deponive ilegale të grumbulluara në lokacione të ndryshme. Gjithashtu, do të planifikojmë edhe një organizim të përgjithshëm për pastrimin frontal të gjithë territorit me pjesëmarrje të zgjeruar qytetare”, ka pohuar Haziri, duke kërkuar që Gjilani të bëhet qytet ekologjik. 

(Kosova Sot)

7 orë e 51 minuta më parë
15/12/18