Lexoni edhe:
Flasin disa prej vajzave të liruara në Nigeri pasi u rrëmbyen nga disa persona të armatosur
Shoferi shpëton foshnjën e rënë nga ballkoni i katit të 12
Një shofer shpërndarjesh u mbiquajt “super-hero” në kryeqytetin vietnamez Hanoi, pasi shpëtoi një dy-vjeçare që ra nga një ballkon i katit 12.
31-vjeçari Nguyen Ngoc Manh, ishte ulur në makinën e tij teksa priste dërgesën e radhës dje pasdite, kur dëgjoi të qarat e fëmijës, tha ai pas ngjarjes për rrjetin vendas Anninhthudo. Një grua nisi të bërtasë dhe ai nxori kokën jashtë për të parë çfarë po ndodhte.
Ai tha se fillimisht besonte se bebja ishte zemëruar, por shpejt e kuptoi se ishte diçka tjetër pasi ndodheshin rreth 50 metra në lartësi.
“Pashë vajzën e vogël që u zvarrit jashtë ballkonit,” tha ai, duke shtuar se menjëherë ishte ngjitur mbi një ndërtesë për t’u afruar në rast se fëmija binte.
“U ngjita në një çati dy metra të lartë duke u pozicionuar për të kapur vajzën”.
Nguyen hipi mbi ndërtesën ku mbaheshin gjeneratorë, dhe tha se humbi ekuilibrin kur fëmija ra, por u lëshua përpara për ta kapur dhe pas impaktit të dy bënë një vrimë në çatinë e llamarinës.
“U përpoqa të zgjas duart për ta kapur, duke shpresuar që të paktën ta ndaloja të binte direkt përtokë”.
Në pamje të incidentit, të marra nga apartamentet përballë shihet fëmija që del pranë ballkonit, ndërsa fqinjët tmerrohen.
“Për fat bebja ra në prehrin tim. E përqafova por më pas pashë gjak që i rridhte nga goja. Isha shumë i trembur”, tha Manh.
Fëmija u dërgua në spital dhe mediat vendase thanë se kishte pësuar zhvendosje të legenit, por jo plagë të tjera. Doktori Le Ngoc Duy, tha se bebja u vendos në allci dhe po monitorohet.
(Kosova Sot Online)
