Lexoni edhe:
Raporti i fundit për vdekjet dhe rastet e reja me COVID-19
Nisin hetimet për vdekjen e 23-vjeçares nga Drenasi
Një vajzë 23-vjeçare nga fshati Zabel i Drenasit ka vdekur në Klinikën Emergjente të QKUK-së. Sipas kësaj të fundit, e reja u nda nga jeta si pasojë e hemorragjisë intraabdominale (gjakderdhje në bark).
Prokuroria Themelore e Prishtinës ka nisur hetimet për rastin e vdekjes së 23-vjeçares, ka konfirmuar zëdhënësja e prokurorisë Laureta Ulaj.
“Lidhur me rastin për të cilin keni kërkuar informata, mund t’ju njoftoj se Prokuroria Themelore në Prishtinë, konkretisht Departamenti i Krimeve të Rënda, është duke e trajtuar rastin në fjalë”, ka konfirmuar Ulaj.
Pas lajmit për vdekjen e 23-vjeçares Klinika Emergjente e QKUK-së ka dalë me një njoftim për media, në të cilin u tha se vdekja e 23-vjeçares nga fshati Zabel i Drenasit është si pasojë e hemorragjisë intraabdominale (gjakderdhje në bark), shok hemorragjik.
“Klinika Emergjente e Qendrës Klinike Universitare e Kosovës, në lidhje me lajmet e publikuara për vdekjen e Z. I ( 1998), nga fshati Zabel i Drenasit, sqaron se, pacientja vjen në Klinikën Emergjente në QKUK në ora 16:30, të datës 15 shtator 2021, me autoambulancë nga Qendra e Mjekësisë Urgjente në Prishtinë, për shkak të humbjes së vetëdijes, me bebëza të zgjeruara, pa tension arterial, pa puls periferik, me frymëmarrje të vështirësuar. Menjëherë mjekët dhe stafi shëndetësorë ka ndërmarrë masat reanimatore, pacientes i bëhen analizat laboratorike, radiologjike dhe konsulencat tjera mjekësore”, thuhet në reagim.
Tutje, aty thuhet se familjarët e viktimës kanë refuzuar obduksionin.
“Përkundër përpjekjeve maksimale nga stafi i Klinikën Emergjente, pacientja nuk arriti të mbijetonte, vdekja konstatohet në ora 17:45. Diagnoza përfundimtare e vdekjes ishte hemoragjia intraabdominale ( gjakderdhje në bark), shok hemoragjik. Familjarët kanë refuzuar abduksionin”, thuhet në reagim.
Ndryshe, në media sot u raportua se familjarët e 23-vjeçares nga Drenasi kanë deklaruar se ajo ka vdekur dy ditë pasi është vaksinuar me vaksinën anti-COVID.
(Kosova Sot Online)
