Reduktimet e gjata me rrymë, KEDS’i del me sqarim dhe një sugjerim

KEDS’i ka dal me sqarim pas ankesave të qytetarëve se reduktimet e energjisë elektrike po zgjasin më shumë se dy orë.

Sipas kësaj kompanie, arsye për këto reduktime më të gjata, janë ngarkesat që po shfaqen në dalje gjatë këtij procesi.

Lexoni edhe:

Blerja e gjësendeve të dorës së dytë, trend në Kosovë

“Këto ndalesa sipas planit do të vazhdojnë të jenë rreth 2 orë për secilin grup të konsumatorëve, në periudha të ndryshme të ditës. Dukuri që po pengon kyçjen me kohë të grupeve të caktuara, janë ngarkesat e mëdha që po shfaqen në dalje gjatë këtij procesi”, thuhet në sqarim.

E që të mos ketë të tilla vonesa, KEDS’i ka sugjeruar konsumatorët që kur s’kanë energji, t’i kenë të shkyçura apo të larguara nga priza.

“Për të eliminuar këtë dukuri, kërkohet bashkëpunimi i të gjithëve. Konsumatorët të cilët janë pa energji elektrike, sipas planit të kufizimeve duhet që pajisjet elektrike mundësisht t’i kenë të shkyçura apo të larguara nga priza, në mënyrë që procesi i rikyçjes të secilës dalje të realizohet në mënyrë të suksesshme”, thuhet në njoftim.

Ndryshe, sipas KEDS, reduktimet do të ishin për 2 orë. Por, qytetarët po ankohen se po zgjasin më shumë se aq.

Gazetari Xhemajl Rexha ka thënë se në Velani s’ka rrymë prej mbrëmë në ora 20:00.

“2 orë thanë…Në Velani s’ka rrymë prej mbramë në ora 20:00”, ka shkruar Rexha në Twitter.

Për reduktimet më rrymë ka reaguar edhe aktori Shkumbin Istrefi. Ai ka thënë se reduktimet po zgjasin më shumë se dy orë.

“Dikush e ka sahatin dallash, ose na ose KEDS. 2 oret e tyne koxha gjate po na dalin?!?!?!”, ka shkruar Istrefi.

2 orë thanë...Në Velani s'ka rrymë prej mbramë në ora 20:00.

— Xhemajl Rexha (@xhemajl_rexha) December 23, 2021

(Kosova Sot Online)