Kush po bashkëpunon me grupet kriminale serbe dhe po e spiunon Policinë e Kosovës?
Policia e Kosovës po vazhdon përpjekjet për luftimin e krimit të organizuar dhe korrupsionit. Një numër i shtuar i aksioneve, në të gjithë vendin. Skandalet korruptive si ai me “subvencionet”, rasti “Brezovica”, ndërhyrjet e përsëritura në veri dhe të tjera në luftë për shpërbërjen e krimit të organizuar.
Ishte muaji tetor kur Policia e Kosovës ka intervenuar në veri të vendit për të parandaluar kontrabandimin e mallrave dhe trafiqeve të tjera.
Mirëpo, aksioni i policisë dhe doganës së Kosovës kundër kontrabandimit me mallra shkaktoi ngritje tensionesh në veri të Kosovës, që rezultoi me 6 të lënduar.
Grupet ndërkombëtare të krimit të organizuar serb të orkestruara nga Serbia, filluan t’i nxjerrnin me dhunë në rrugë serbët e atjeshëm, dhe madje duke sjellur edhe qytetarë dhe banditë nga Serbia e Mali i Zi.
Me 8 persona të arrestuar përfundoi një aksion i Policisë kundër kontrabandës më 13 tetor të këtij viti.
Për dallim nga pjesët e tjera të Kosovës, në pjesën veriore doli se serbët ishin mirë të informuar për këtë aksion. Policia hasi në rezistencë, protesta e sulme gjatë aksionit në veriun e vendit. Si pasojë, disa policë e qytetarë mbetën të lënduar.
Aksioni nuk arriti të përfundojë, dhe kjo shtoi dyshimet e drejtuesve të Policisë së Kosovës, se ka pasur rrjedhje informatash.
“Jemi duke hetuar edhe pistën e rrjedhjes së informative, pasi në disa vende ku kemi qenë kemi pa se ka pasur tërheqje të mallit paraprakisht, dhe gjësendeve tjera që ndërlidhen me krimin e organizuar” kishte thënë Drejtori i Policisë, Samedin Mehmeti më 13 tetor.
Më shumë se një muaj pas aksionit, Inspektorati Policor i Kosovës ka konfirmuar për RTK-në se po kryejnë hetime për këtë cështje.
“Në këtë fazë të hetimeve vetëm mund t’iu konfirmojmë se Inspektorati Policor i Kosovës është duke hetuar rastin, dhe është duke ndërmarrë veprime hetimore në koordinim me prokurorinë kompetente”, thuhet në përgjigjen e IPK-së.
Sipas ekspertëve të sigurisë, këto rrjedhje informatash kanë rezultuar fatale për shumë aksione që janë zhvilluar.
“Këtu përfundimisht duhet të ndermerren masa. Nuk është e vështirë të konstatohet brenda aksionit se a ka ndodhë rrjedhja në fazën preliminare, në fazën e përgatitjes së planit, apo gjatë zbatimit. Për këtë arsye duhet të jemi të kujdesshëm që këto në të ardhmen të mos ndodhin”, shprehet Nuredin Ibishi.
Dyshime për rrjedhje informatash ka sa herë nisin aksione në veri. Njëjtë, në nëntorin e 2019-ës nuk u arrit të arrestohej Milan Radojicic, si i dyshuar kryesor për vrasjen e Oliver Ivanovicit.
(Kosova Sot Online)
