Lexoni edhe:
Regjistrim për të dëshmuar se kush është shumicë në Luginë
Çmimet e larta të peletit e drunjve? AKK thotë se po e“mbikëqyr” tregun
Lëndët që përdoren për për ngrohje si peleti dhe drunjtë kanë shënuar rritje të dukshme çmimi, duke i shtuar ankesat e qytetarëve, të cilët përditë po paralajmërohen se sivjet do t’i kenë keq punët me rrymë.
Autoriteti Kosovar i Konkurrencës (AKK), i ka thënë Express se nga muaji gusht kanë filluar hetime për kurdisjen eventuale të çmimeve.
AKK nuk ka treguar se kur do të mbarojnë këto hetime.
“Kryetarja e Autoritetit Znj. Neime Binaku Isufi, gjatë muajit gusht ka autorizuar, Departamentin për Mbikëqyrjen e Tregut, të bëjë shqyrtimin paraprak, për produktin e peletit, dhe disa produkteve qe lidhen me çështjen e energjisë, pas ngritjes së çmimeve në tregun e Republikës se Kosovës, me theks për konstatimin e gjendjes në tregun relevant (të prodhimit dhe importit) të produktit të Peletit për dy vite, 2021 dhe 2022, transparencën, pjesëmarrësit e tregut, dhe shkallën e përqendrimit të këtij tregu relevant.
Të gjitha format që konsiderohen shtrembërim apo kufizim i konkurrencës në tregjet përkatëse, nga operatorët ekonomikë që operojnë në këto tregje, do të jenë objekt i shqyrtimit nga Komisioni për mbrojtjen e Konkurrencës”, thuhet në përgjigje.
Por nuk ka siguri që çmimet nuk do të rriten akoma – pos të ndikuara nga çrregullimi i tregut ndërkombëtare, ka dyshime edhe për “shfrytëzim të situatës”, siç është raportuar.
E për dimrin që po vjen AKK ka thënë se do ta zbatojnë ligjin për ta mbrojtur konkurrencën.
“Autoriteti zbaton ligjin për mbrojtjen e konkurrencës, për të gjitha format e parandalimit, kufizimit ose shtrembërimit të konkurrencës nga ndërmarrjet në territorin e Republikës së Kosovës ose jashtë territorit, nëse veprimet e tyre kanë efekt në tregun e Republikës së Kosovës, gjatë tërë vitit kalendarik”.
Për një vit Autoriteti i Konkurrencës ishte pa komision, që nënkupton pa duar për të ndëshkuar abuzuesit potencialë.
Tash thonë se po e zbatojnë strategjinë e tyre për ta mirëmbajtur konkurrencën.
“Autoriteti i konkurrencës e ka të miratuar, Planin e veprimit të performancës për vitin 2022. Qëllimi i Planit të veprimit është përcaktimi i mekanizmave për të respektuar afatet dhe procedurat në mënyrë që të realizohen qëllimet operative. Rëndësia tjetër e planit të veprimit është funksioni i tij, i cili është si udhërrëfyes i rëndësishëm përcaktues për përmbushjen e detyrave dhe përgjegjësive ligjore të përcaktuara me Ligjin për Mbrojtjen e Konkurrencës. Ligj ky i cili është i mbështetur në tri shtylla kryesore që përcaktojnë mbrojtjen e konkurrencës”.
AAK i përgjigjet Kuvendit të Kosovës dhe funksioni i saj i mundësohet me aktet më të larta juridike.
Në bazë të nenit 10 të Kushtetutës së Kosovës, vendi identifikohet me ekonomi të tregut.
Një nga kushtet e ekonomisë së tregut është edhe konkurrenca e lirë, poqë ndalohet abuzimi me të – e sidomos marrëveshjet sekrete në mes kompanive.
Çmimet janë rritur në secilin sektor, madje Banka Botërore e jep shifrën 19 për qind për ta treguar inflacionin e lartë në vend.
Ndërkaq paga mesatare nuk ka lëvizur, mbetet në 416 euro, sipas Agjencisë së Statistikave të Kosovës.
(Kosova Sot Online)
