Vulin: Nga sot unë jam drejtor i 'BIA-s'
Drejtor i Agjencisë serbe të Zbulimit, e njohur si BIA, është emëruar ish-ministri i Brendshëm i Serbisë, Aleksandar Vulin, transmeton gazeta “Kosova Sot Online”.
Lajmin për këtë emërim e dhanë disa media në Serbi, përfshirë televizionin shtetëror – RTS, i cili tha se vendimi u mor nga Qevria e Serbisë.
Shërbimi i Ballkanit i Radios Evropa e Lirë dërgoi pyetje në Qeverinë e Serbisë në lidhje me emërimin e Vulinit, por nuk mori përgjigje.
Para Vulinit, në këtë post ishte Bratisllav Gashiq, tani ministër i Punëve të Brendshme të Serbisë.
BIA është një shërbim civil i sigurisë kombëtare të Republikës së Serbisë.
Ajo është përgjegjëse për mbrojtjen e sigurisë së këtij vendi dhe, ndër të tjera, për zbulimin dhe parandalimin e aktiviteteve që, siç thuhet, synojnë cenimin ose rrëzimin e rendit të vendosur me Kushtetutën e Republikës së Serbisë.
Vulin, më herët, ka qenë edhe drejtor i Zyrës për Kosovën në Qeverinë e Serbisë.
(Kosova Sot Online)
