Lexoni edhe:
Vrasje e dyfishtë në këtë qytet: 43-vjeçari vret me armë kunatën e më pas, veten
James Rubin viziton disa shtete në Ballkan, anashkalon Kosovën dhe Serbinë
I dërguari special dhe koordinatori për Qendrën Globale të Angazhimit, James P. Rubin do të vizitojë për 4 ditë Shqipërinë, Malin e Zi dhe Maqedoninë e Veriut. Megjithatë, ai nuk do të ndalet në Kosovë dhe Serbi.
Departamenti i Shtetit njofton se ai do të udhëtojë nga data 10-14 prill në Podgoricë, Shkup, dhe Tiranë,transmeton "Kosova Sot Online ".
“Në Podgoricë dhe Shkup, i dërguari i posaçëm Rubin do të takohet me zyrtarë qeveritarë për të forcuar mbështetjen për nismat kundër dezinformimit. Ai do të diskutojë përpjekjet e Rusisë, Republikës Popullore të Kinës dhe aktorëve të tjerë keqdashës që përdorin dezinformata për të minuar demokracinë dhe sigurinë kombëtare në mbarë globin, dhe se si kombet tona mund t’i kundërshtojnë së bashku kërcënimet në hapësirën e informacionit”, thuhet në deklaratë.
Gjatë qëndrimit në Tiranë, i dërguari i posaçëm Rubin do të marrë pjesë në takime me ambasadorët amerikanë nga Ballkani Perëndimor.
Kujtojmë se James P. Rubin është emëruar në dhjetor të vitit të kaluar në këtë detyrë nga sekretari i Shtetit, Anthony Blinken.
Rubin është një emër i lidhur ngushtë me historinë e çlirimit të Kosovës. Ai shërbeu si Ndihmës Sekretar i Shtetit për Çështjet Publike dhe zëdhënës kryesor i Sekretares së Shtetit, Madeleine Albright. Në vitin 1999 ishte negociator special për të siguruar demobilizimin e Ushtrisë Çlirimtare të Kosovës.
Rubin shërbeu gjithashtu si Këshilltar i Lartë dhe zëdhënës i përfaqësueses së SHBA-së në Kombet e Bashkuara, Madeleine Albright. Ai është nderuar me Medaljen Presidenciale të Meritave nga presidentja Atifete Jahjaga vite më parë.
(Kosova Sot Online )
