Bajrami godet Muratin: Kënd po provoni ta mashtroni?

Nënkryetarja e Lidhjes Demokratike të Kosovës, Hykmete Bajrami publikoi një grafik për rritjen ekonomike, duke u bazuar në të dhënat e Agjencisë së Statistikave të Kosovës, pasi ministri i Financave, Hekuran Murati, duke u thirrur po ashtu në të dhëna të ASK-së, paraprakisht publikoi një tjetër grafik për të dëshmuar, siç tha, se “ekonomia e vendit ka vazhduar rritjen”, transmeton gazeta “Kosova Sot Online”.

Bajrami përmendi në Facebook inflacionin enorm e milionat e shpenzuara në tenderë njëburimor.

“Hekurani qenka bërë kreativ këtë të dielë, por rritja ekonomike sipas Agjencisë së Statistikave të Kosovës duket si në foton me poshtë”, shkroi ish-ministrja, duke publikuar një grafik, së bashku me link-un e ASK-së.

“Derisa gjatë këtij mandati ka pasë inflacion enorm mbi 23% në kumulativ (2021: 3.4%; 2022: 11.6%; 2023: 5%; shkurt 2024: 2.2%), janë dhënë mbi 240 milionë euro tenderë njëburimor e investimet kapitale të nivelit qendror në 2023 janë sa ato të vitit 2017 vetëm 349 milionë euro”, shtoi Bajrami.

“Kënd po provoni ta mashtroni?”, shkroi në fund deputetja.

(Kosova Sot Online)