Bislimi: Kosova qëndron në ofertën e saj për të ofruar zgjidhje teknike rreth dinarit
Zëvendëskryeministri i Kosovës, Besnik Bislimi, ka shkruar në platformën “X”, t% martën për takimin që kishte me kryenegociatorin serb, Petar Petkoviq nën ndërmjetësimin e Miroslav Lajçakut, emisarit të Bashkimit Evropian për dialogun Kosovë-Serbi, transmeton gazeta "Kosova Sot Online".
Bislimi ka thënë se Kosova qëndron në ofertën e saj për të ofruar zgjidhje teknike rreth dinarit bazuar në planin e përbashkët me vendet e Quint.
Po ashtu Bislimi, ka thënë se Serbia ka vazhduar ta refuzojë marrëveshjen bazike dhe zbatimin e saj.
“Diskutohet sot në Bruksel në takimet e procesit të dialogut lidhur me zbatimin e Marrëveshjes Themelore dhe Aneksit Zbatues. Për fat të keq, Serbia përsëri refuzoi marrëveshjen dhe zbatimin e saj”.
“Kemi prekur edhe një varg çështjesh, ku janë trajtuar edhe disa shkelje të marrëveshjeve nga Serbia, si për energjinë, telekomunikacionin dhe pengimin e anëtarësimit të Kosovës në organizatat ndërkombëtare”, ka deklaruar Bislimi.
“Sa i përket rregullores së Bankës Qendrore të Kosovës për operacionet me para të gatshme dhe transparencën, palët do të sjellin ide konkrete se si mund të duket një zgjidhje afatshkurtër, duke respektuar gjithmonë vendimin në fjalë të BQK-së”.
“Republika e Kosovës qëndron në ofertën e saj për të ofruar zgjidhje teknike bazuar në planin e përbashkët me vendet e Quint”, ka deklaruar Bislimi.
(Kosova Sot Online)
