Zbardhen detaje: Rrustem Llapi ia bëri me dorë policisë menjëherë pas të shtënave

“Pas të shtënave fatale, ai ia bëri me dorë në mënyrë rastësore policisë”.

Kështu shkruan sot tabloidi gjerman ‘Bild’ në titullin e një artikulli të fundit rreth vrasjes së të dielës mbrëma në Dyseldorf, për të cilën është arrestuar Rrustem Rushiti, një 52-vjeçar nga Podujeva,  transmeton gazeta "Kosova Sot Online".

‘Bild’ ka publikuar një video të re në të cilën thuhet se shfaqet Rrustem Rushiti, i njohur me nofkën ‘Llapi’, duke ia bërë në mënyrë krejt rastësore me dorë Policisë gjermane disa momente pas të shtënave me armë.

Video të cilën e ka publikuar Bild, është incizuar nga një dëshmitar okular. Pas vrasjes, sipas imazheve të reja, kosovari nuk është larguar nga vendi i ngjarjes.

Një foto (e nxjerrë nga video), e publikuar nga ‘Bild’, shfaq Rushitin me një këmbë mbi një bllok-mbrojtës të rrugës. Pranë tij, shihet i shtrirë në tokë Aleksandar M., reperi gjerman me origjinë serbe, i cili vdiq në vendin e ngjarjes.

Mediat gjermane kanë raportuar të hënën se viktima Aleksandar M. ishte edhe reper dhe i pëlqente të prezantohej në internet si ” gangster” i vërtetë. Ai kultivonte një imazh si biznesmen pasanik, herë pozonte me një Ferrari, herë me xhipa të mëdhenj.

Ndërkaq, Rrustem Llapi është një shqiptar nga Podujeva, i cili në rrjetet sociale publikonte shpesh video në Tik-Tok në të cilat shfaqej herë në Kosovë, e herë në Gjermani. 

(Kosova Sot Online)