Kurti lajmërohet nga 'Panairi i Shkencës dhe Kulturës'

Kryeministri i Kosovës, Albin Kurti, ka marrë pjesë në “Panairin e Shkencës dhe Kulturës” që po mbahet në gjimnazin “Xhevdet Doda”. Ai u shoqërua nga ministri i Shëndetësisë, Arben Vitia, transmeton gazeta “Kosova Sot Online”.

“Kryeministri i Republikës së Kosovës, Albin Kurti, i shoqëruar nga ministri i Shëndetësisë, Arben Vitia, gjatë pasdites vizitoi Shkollën e Mesme, “Xhevdet Doda” në Prishtinë, me rastin e organizimit të edicionit të 5-të, të “Panairit të Shkencës dhe Kulturës”, i cili po mbahet në ambientet e kësaj shkolle.”

Kurti e uroi drejtorit të shkollës për organizimin e panairit, ndërsa nxënësit i përgëzoi për idetë dhe projektet.

“I mirëpritur nga Drejtori i Shkollës, Bardhyl Kabashi dhe stafi i tij, kryeministri Kurti, shprehu mirënjohjen për punën dhe kontributin e tyre të vazhdueshëm në arsimimin dhe edukimin brezave të rinj, teksa i uroi për organizimin  e Panairit. Ndërkaq, nxënësit i përgëzoi për idetë, projektet dhe punimet e tyre, duke i inkurajuar ata që të vazhdojnë interesimin për shkencën, kulturën e teknologjinë dhe të ushqejnë në vazhdimësi kuriozitetin prej shkencëtari.”

““Panairi i Shkencës dhe Kulturës”, ka për qëllim kryesor që të rejat e të rinjtë të shprehin dijen e tyre, të shfaqin kreativitetin dhe aftësitë e fituara, në fushat e shkencës, teknologjisë, artit dhe kulturës. Me moton “Shkenca e së sotmes është teknologjia e së ardhmes”, panairi ofron një platformë për nxënësit për të shfaqur idetë e tyre inovative dhe eksperimentet shkencore. Ai mbahet me datë 2 dhe 3 maj. Gjatë këtyre dy ditëve në Panair ekspozohen punime të nxënësve nga lëndët shkollore si matematika, biologjia, fizika, astronomia, teknologjia, kimia, historia, psikologjia, filozofia, për të përfunduar te këndi i kulturës tradicionale dhe këndi i lojërave interaktive.”

(Kosova Sot Online)