Kurti për vdekjen e Ismail Kadaresë: Arti dhe kultura jonë i kanë borxh të pamatshëm oqeanit të mendjes së tij

Kryeministri i Kosovës, Albin Kurti, ka reaguar pas lajmit të vdekjes së shkrimtarit, Ismail Kadare, përcjell “Kosova St Online”.

Kurti ka thënë se bota humbi shkrimtarin e saj më të madh të gjallë.

Kurti ka shkruar se Anija e romaneve të Kadaresë do të lundrojë pafundësisht, për aq sa bota do të ketë lexues dhe shqipja shqiptarë.

“Ne humbëm shkrimtarin më të madh të të gjitha kohërave, bota humbi shkrimtarin e saj më të madh të gjallë. Porsa hymë në gjysmën e dytë të vitit 2024, Kadare mbylli sytë përgjithmonë. Por sytë tanë kanë parë e do të shohin shumë më mirë për shkak të imagjinatës dhe dijes së Ismail Kadaresë. Kur ai mbyllte sytë në të gjallë të tij dhe mendohej për malet e Shqipërisë dhe greminat e historisë, teksa qëndiste mijëra faqe me shqipe të bukur si qiell, ne kolektivisht shikonim më qartë e dukeshim më mirë, mendonim më thellë e mësonim më shumë. Arti dhe kultura jonë i kanë borxh të pamatshëm oqeanit të mendjes së tij. Anija e romaneve të Kadaresë do të lundrojë pafundësisht, për aq sa bota do të ketë lexues dhe shqipja shqiptarë. Ngushëllime të gjithëve.”

(Kosova Sot Online)