Palestinezët në kërkim për strehë të sigurt

Disa dhjetëra mijëra palestinezë po kërkojnë strehim dhe një vend të sigurt, pasi eksodi nga qyteti i dytë i Gazës, Khan Younis, vazhdon si përgjigje ndaj urdhrave për evakuim ushtarak izraelit, transmeton gazeta “Kosova Sot Online”.

Kombet e Bashkuara vlerësojnë se 250,000 persona në pjesët lindore të qytetit janë të prekur nga urdhrat e lëshuara të hënën, të cilat sugjerojnë se forcat izraelite janë gati për të hyrë përsëri.

Raportet tregojnë se një sulm ajror izraelit të martën vrau 12 palestinezë në një zonë humanitare të caktuar nga Izraeli, ku njerëzve u është thënë të largohen.

Një spital i madh në Khan Younis tani është bosh, pasi të gjithë pacientët dhe personeli mjekësor janë larguar. Shumica e qytetit u shkatërrua gjatë një ofensive të gjatë izraelite më herët këtë vit, por një numër i madh palestinezësh kishin shkuar atje për të shpëtuar nga një operacion tjetër izraelit pranë Rafahut.

Shpërthime, bombardime dhe të shtëna u dëgjuan gjithashtu nëpër qytetin e Gazës të mërkurën, ndërsa forcat izraelite vazhdojnë të luftojnë.

Duke folur nga kampi i refugjatëve Nuseirat në qendër të Gazës, Louise Wateridge nga agjencia e Kombeve të Bashkuara për refugjatët palestinezë (UNRËA) i tha BBC-së se stafi i tyre në terren kishte vëzhguar lëvizjen “shumë kaotike” të civilëve nga Khan Younis-i lindor. “Është ndryshe nga zhvendosjet e mëparshme, ku kemi parë kamionë dhe mjete”.

“Ka mjete të kufizuara në dispozicion, ka karburant të kufizuar, rrugët janë aq të rrezikshme, situata është aq e pasigurt. Në këtë fazë, njerëzit vërtet po mbajnë atë që mundin në dorë dhe po lëvizin”.

(Kosova Sot Online)