Lexoni edhe:
Ligji i ri, në zgjedhjet e ardhshme për Kuvend, mund të votohen deri në 10 kandidatë për deputetë nga një subjekt
Franca kryen operacion të madh kundër spiunazhit kibernetik
Autoritetet në Francë kanë nisur një operacion të madh për të pastruar kompjuterët e infektuar nga një program i spiunazhit kibernetik që ka prekur miliona përdorues në mbarë botën, transmeton "Kosova Sot Online ".
“Në prag të Olimpiadës, ky operacion tregon se lojtarë të ndryshëm në Francë dhe jashtë vendit janë të mobilizuar që të luftojnë të gjitha format e krimit kibernetik”, tha kryeprokurorja e Parisit, Laure Beccuau, përmes një deklarate më 25 korrik.
Ajo tha se hetuesit po shënjestrojnë një rrjet të ‘bot’-ëve , që dyshohet se kanë infektuar kompjuterët me një virus. Po ashtu ky rrjet besohet se po vjedh të dhëna nga përdoruesit, “veçanërisht për qëllime spiunazhi”.
Beccuau tha se analistët dhe hetuesit kanë arritur të marrin nën kontroll serverin që ka nën kontroll miliona kompjuterë të infektuar me virus.
Autoritetet franceze e kanë nisur këtë operacion më 18 korrik dhe i njëjti pritet të zgjasë disa muaj. Sipas njoftimit, deri më tani autoritetet kanë arritur të ndihmojnë viktima në disa shtete evropiane.
Në njoftimin e kryeprokurores së Parisit nuk u përmend ndonjë kërcënim specifik ndaj Lojërave Olimpike që do të mbahen në Paris. Por, ndaras, agjencia për siguri kibernetike në Francë tha javën e kaluar se sulmet kibernetike do të jenë “të pashmangshme” gjatë Olimpiadës, e cila nis të premten.
(Kosova Sot Online )
