Lexoni edhe:
Haxhiu thotë se Faton Hajrizin e telefonoi dikush para se të arratisej, rastin e tij e ndërlidh me protestat kundër litiumit në Serbi
Zbulohen detaje nga laboratori ku u identifikuan shenjat e gishtërinjve të Faton Hajrizit
Një javë më parë, shteti serb ka dërguar gjurmët e gishtërinjve të një personi të raportuar si të vrarë në Serbi, të cilat pas krahasimit në Agjencinë e Kosovës për Forenzikë (AKF), kanë rezultuar se janë të njëjta më të arratisurin nga burgu i Smrekonicës, Faton Hajrizi, transmeton "Kosova Sot Online ".
Janë gjurmët e fundit që u mblodhën në vendin e ngjarjes. Në këtë formë, në Agjencinë e Kosovës për Forenzikë, të hënën erdhi edhe një kërkesë.
Ekspertëve të daktiloskopisë, iu kërkua që ta identifikojnë personin të cilit i takojnë këto gjurmë.
E këtë punë, ka mbi dy dekada që e kryen specialisti i lartë për daktiloskopi, Flurim Sahitaj.
Ai ka treguar se cilët janë hapat që ndiqen deri tek identifikimi i një personi përmes këtyre dëshmive fizike.
“Së pari bëhet vlerësimi i gjurmës së vijave papilare, pastaj vlerësohet nëse është e përshtatshme gjurma e vijave papilare për t’u skanuar ose si i themi ne për tu insetuar në sistemin kompjuterik. Pastaj sistemi i jep kandidatët e mundshëm potencial, por në këtë rast është specialisti që e vendos me cilët persona krahasohet, janë diku 10-20 persona dhe vjen deri tek rezultati i identifikimit”, tha Sahitaj, për tëvë1.
Së fundmi, këtij procesi iu nënshtruan edhe gjurmët e ardhura nga shteti serb, të cilët thanë se i përkasin një personi të vrarë në Loznicë.
E pas identifikimit, doli se i përkasin të arratisurit nga burgi i Smrekonicës, Faton Hajrizit.
Por, a mund të ketë gabime në identifikimin e një personi përmes kësaj metode?
“Marzha e gabimit nuk ekziston në këto raste, sepse eksperti e vlerëson çdo detaj të një gjurme të vijave papilare dhe shenjës së gishtërinjve. Është versioni i sistemit, i emërtuar si Cabis 7, ku në mënyrë automatike bëhet identifikimi i gjurmëve të vijave papilare të ardhura nga vendi i ngjarjes dhe i shenjave të gishtërinjve të personave potencialisht të dyshuar”, tha ai.
Ndërkohë, udhëheqësi i divizionit të daktiloskopisë dhe traseologjisë, Gjokë Gegaj, ka treguar se në cilat raste kryhet ky lloj identifikimi në AKF.
“Kryesisht bazohemi në kërkesat dhe urdhëresat e organeve hetuese, të policisë apo agjencioneve të tjera që punojnë për zbatimin e ligjit. Kryesisht kërkesën i bëjnë hetuesit përmes prokurorëve, ashtu që kërkesa vinë e regjistrohen në divizionin e pranimit të provave”, tha Gegaj.
Gegaj po ashtu ka treguar se cila është karakteristika e këtij procesi.
“Parimi i parë është që askund në botë, deri më tash, nuk janë gjetur dy persona me shenjat e gishtave të njëjta”, tha ai. Ndryshe në këtë divizion të AKF-së, punojnë tetë ekspertë të kësaj lëmie më përvojë pune më shumë se 20 vjeçare.
