Prokuroria jep detaje për plagosjen në Viti

Dy burra janë plagosur dje nga arma e zjarrit në Viti pas një mosmarrëveshje rreth kontestit pronësor, transmeton gazeta "Kosova Sot Online".

Për këtë rast, Prokuroria Themelore në Gjilan ka parashtruar kërkesë për paraburgim ndaj të pandehurve N.H., N.B., për shkak të dyshimit se kanë kryer veprat penale ‘’Vrasja e rëndë në tentativë’’ dhe ‘’Mbajtja në pronësi, kontroll ose posedim të paautorizuar të armëve’’ dhe të pandehurit A.B., për veprën penale ‘’Mbajtja në pronësi, kontroll ose posedim të paautorizuar të armëve”.

“Sipas kërkesës ekziston dyshimi i bazuar se, i pandehuri N.H., më 08 Gusht 2024, rreth orës 10:07 minuta, në komunën e Vitisë, me dashje ka tentuar t’i privojë nga jeta  të pandehurit N.B. dhe A.B., në atë mënyrë që për shkak të mosmarrëveshjeve pronësore, sapo i sheh të njëjtit që me djemtë e tyre kishin shkuar në pronën kontestuese, shkon në shtëpinë e tij, merr një armë automatike AK-47 dhe gjuan pandërprerë në drejtim të tyre, me ç’rast  të pandehurin N.B. e plagos në këmbë, ndërsa të pandehurin A.B. e plagos në të dy këmbët, duke rrezikuar edhe personat që gjendeshin në të njëjtin vend”, ka njoftuar Prokuroria Themelore e Gjilanit. 

Prokuroria shtoi se “i pandehuri N.B., e kishte armën e zjarrit me vete dhe sapo e sheh që i pandehuri  N.H., nga shtëpia e tij kishte dalë me armë, gjuan disa herë në drejtim të tij, por nuk arrin ta qëllojë, duke vënë në rrezik edhe jetën e bashkëshortes së tij, e cila ishte me të”.  

I pandehuri A.B., dyshohet për armëmbajtje pa leje, e cila është gjetur pas kontrollit në shtëpinë e tij, si dhe të gjitha armët e të pandehurve janë sekuestruar nga ana e zyrtarëve policorë.

(Kosova Sot Online)