Ramabaja: ShBA-ja po kalon një periudhë të ngjashme me vitet e fundit të Bashkimit Sovjetik

Sadri Ramabaja, analist dhe anëtar i Lëvizjes Vetëvendosje, ka paraqitur një analizë të re që ngre shqetësime për të ardhmen e superfuqisë botërore, Shtetet e Bashkuara të Amerikës, transmeton gazeta “Kosova Sot Online”.

Sipas tij, fitorja e Donald Trump në zgjedhjet e ardhshme mund të shënojë një periudhë të vështirë për Uashingtonin, duke krahasuar gjendjen aktuale të ShBA-së me vitet e fundit të Bashkimit Sovjetik.

Në analizën e tij, Ramabaja thekson se me ardhjen e Trump në Shtëpinë e Bardhë, ShBA do të hyjë në një fazë të re, që ai e cilëson si “periudhë të vonë të perandorisë amerikane”. Sipas tij, ky moment do të shoqërohet me një rënie të dukshme të dominimit global të Uashingtonit dhe një konsolidim të rendit të ri botëror. Ramabaja shton se analistët ushtarakë janë gjithnjë e më të prirur të pranojnë se hegjemonia amerikane po dobësohet shpejt.

Duke parë zhvillimet globale dhe ndikimin e faktorit amerikan, Ramabaja rekomandon që Bashkimi Evropian të ulë varësinë e tij nga ShBA në furnizimin me armë dhe teknologji ushtarake. Ai beson se ky hap mund të jetë thelbësor për përballimin e ndryshimeve të mundshme në politikën amerikane dhe forcimin e autonomisë strategjike të Evropës.

Kjo analizë pasqyron shqetësimin për një rend të ri botëror, në të cilin ShBA-ja mund të humbasë pozitat dominuese, duke hapur mundësi për aktorë të tjerë ndërkombëtarë të forcojnë ndikimin e tyre në skenën globale.

(Kosova Sot Online)