Administrata e Bidenit nuk do të kufizojë transferet e armëve në Izrael

Administrata Biden tha të martën se Izraeli ka bërë një përparim të mirë, por të kufizuar në rritjen e fluksit të ndihmave humanitare që hyjnë në Gaza dhe nuk do të kufizojë transferimin e armëve në Izrael, siç kishte kërcënuar një muaj më parë nëse situata nuk do të përmirësohej, transmeton gazeta “Kosova Sot Online”.

Grupet e ndihmës thonë se kushtet janë më të këqija se në çdo moment në luftën 13-mujore.

Zëdhënësi i Departamentit të Shtetit, Vedant Patel, u tha gazetarëve se progresi i deritanishëm duhet të plotësohet dhe të mbahet, por “ne, në këtë kohë, nuk kemi bërë një vlerësim se izraelitët janë në shkelje të ligjit të SHBA-së”. SHBA kërkon që marrësit e ndihmës ushtarake t’i përmbahen ligjit ndërkombëtar humanitar dhe të mos pengojnë ofrimin e një ndihme të tillë, raporton AP.

“Ne nuk po i japim një leje Izraelit”, tha Patel, duke shtuar se hapat që ka ndërmarrë Izraeli nuk kanë bërë ende një ndryshim mjaftueshëm domethënës.

“Ne duam të shohim përmirësimin e situatës humanitare në tërësi dhe ne mendojmë se disa nga këto hapa do të lejojnë kushtet që ajo të vazhdojë të përparojë”.

(Kosova Sot Online)