Vdiq gazetari Zijadin Gashi

Gazetari kosovar, Zijadin Gashi, ka vdekur mëngjesin e sotëm, transmeton gazeta “Kosova Sot Online”.

Lajmin e kanë bërë të ditur familjarët përmes rrjeteve sociale.

“Të dashur familjarë e miq, Me dhimbje të thellë ju njoftojmë që sot me datë 3.12.2024 ndërroi jetë më i dashuri jonë, Zijadin Gashi. Varrimi do të bëhet sot në varrezat e qytetit të Prishtinës në kohën e Ikindisë, ora 14:00”, thuhet në njoftimin e familjarëve të tij.

Zijadin Gashi pak muaj më parë i ishte nënshtruar një ndërhyrje kirurgjike në tru.

Atë kohë vetë gazetari Gashi kishte njoftuar se operimi ka rezultuar i suksesshëm dhe se pret që t’i kalojë edhe sfidat pas operacionit, duke shpresuar se një ditë do t’i rikthehet edhe profesionit.

Zijadin Gashi ka qenë pjesë aktive e gazetarisë kosovare para dhe gjatë luftës, kurse edhe pas çlirimit punoi në disa prej mediumeve të shkruara e elektronike në Kosovë.

Siç ka njoftuar familja, varrimi i të ndjerit do të bëhet sot në varrezat e qytetit të Prishtinës, ora 14:00.

(Kosova Sot Online)