Vetëvendosje e Albin Kurtit po pret që në zgjedhjet e 9 shkurtit, t’i fitojë 500 mijë vota!
Lëvizja Vetëvendosje e kryeministrit Albin Kurti, i ka prezantuar publikisht pritjet për zgjedhjet e 9 shkurtit, transmeton gazeta “Kosova Sot Online”.
Bazuar në postimet në rrjete sociale nga ministra, deputetë e zyrtarë të VV-së, partia e Albin Kurtit po pret që në zgjedhjet e ardhshme, t’i fitojë 500 mijë vota.
Albulena Haxhiu ka shkruar se 500 mijë vota është pragu për pavarësi nga Lista Serbe dhe elita e vjetër e korruptuar.
Të njëjtën pritje e ka edhe ‘komisarja’ e partisë në pushtet, Dejona Mihali.
“Ftojmë 500 mijë zemra flakë të kuqe për të ecur para. 500k Lëvizja VETËVENDOSJE!”, ka shkruar Mihali.
Zëdhënësi i Vetëvendosjes, Arlind Manxhuka, ka shkruar se duhen 500 mijë vota për t’i vazhduar reformat.
Zgjedhjet mbahen më 9 shkurt të vitit 2025.
Vetëvendosje ka publikuar edhe listën me kandidatë për deputetë, ku nuk ka fort ndryshime nga ajo e kaluara.
Në anën tjetër, pikërisht në këtë kohë, Vetëvendosje ka nisur viktimizimin, duke e akuzuar Prokurorinë Speciale për ftesën ndaj kryeministrit Kurti lidhur me dallaveret me rezervën shtetërore.
(Kosova Sot Online)
