Lumir Abdixhiku synon fitoren në zgjedhjet e 9 shkurtit 2025, por LDK renditet e treta në sondazhin e fundit
Lumir Abdixhiku, kryetar i Lidhjes Demokratike të Kosovës (LDK), ka shprehur synimin e tij për të fituar zgjedhjet e 9 shkurtit 2025 dhe për t'u ulur në karrigen e kryeministrit, transmeton gazeta “Kosova Sot Online”.
Megjithatë, një sondazh i fundit ka treguar se partia e tij renditet e treta, me vetëm 17.7% të mbështetjes së mundshme nga votuesit.
Sipas sondazhit të realizuar, Lëvizja Vetvendosje (LVV) kryeson me një rezultat dominuese prej 47.1% të votave, duke ruajtur pozitat e saj si partia më e fuqishme politike në vend. Pas LVV-së, Partia Demokratike e Kosovës (PDK) renditet në vendin e dytë me 19.5% të mbështetjes. Ndërkaq, LDK, partia që aktualisht udhëhiqet nga Abdixhiku, mbetet në vendin e tretë, me një mbështetje të kufizuar prej 17.7%. Aleanca për Ardhmërinë e Kosovës (AAK) ka 6.6% të mbështetjes, ndërsa partitë e tjera përbëjnë 9.1% të votave të mundshme.
Ky sondazh sugjeron një sfidë të madhe për LDK-në në zgjedhjet e ardhshme dhe për Abdixhikun që ka shprehur synime të forta për t'u bërë kryeministër. Megjithatë, koha do të tregojë se si do të zhvillohen fushatat dhe përkrahja e partive të tjera gjatë periudhës para zgjedhjeve.
(Kosova Sot Online)
