Disa të arrestuar për vrasjen e rreshterit Lika, raportohet se ekzekutori është një 18 vjeçar

Një aksion është realizuar sot në Kaçanik. Zëdhënësi i Policisë së Kosovës, Baki Kelani, ka konfirmuar se operacioni lidhet drejtpërdrejt me hetimet për vrasjen e rreshterit Muhamed Lika, i cili u ekzekutua pak javë më parë në qendër të Kaçanikut, transmeton gazeta “Kosova Sot Online”.

Indeksonline raporton se janë arrestuar 7 persona, përfshirë një ish polic dhe një ish ushtar të FSK’së, të cilët dyshohet se i janë bashkuar një grupi të organizuar ekstremist.

Po ashtu ky medium raporton se një nga personat e arrestuar është R.B. 18 vjeç, që sipas hetimeve dyshohet si ekzekutori kryesor i rreshterit Lika.

Sipas Indeksit në momentin e kryerjes së krimit, R.B. ishte vetëm 17 vjeç, por dyshimet janë se vrasja mund të jetë kryer me paramendim dhe si pjesë e planifikimeve të këtij grupi të rrezikshëm.

Pas arrestimit, të gjithë të dyshuarit janë dërguar në stacionin policor ku pritet të intervistohen nga prokurori i rastit, i cili do të vendosë për masat e mëtejshme.

(Kosova Sot Online)