Shqiptarë, dukuni shqiptarë se në politikë gjithmonë fiton më i forti!

Shkruan: Skënder Kapiti

“Greqia kërkon Jugun e Shqipërisë dhe detin shqiptar, e ndërsa Serbia kërkon të marrë nga Kosova çfarë asaj i duhet dhe Shqipërisë një dalje në Adriatik. Prandaj, dukuni shqiptar, dukuni! Serbia kërkon një Minishengen shqiptaro-sllav për ta gllabëruar ekonomikisht jo vetëm Kosovën që nuk e njeh, por edhe Shqipërinë. Si ka mundësi që Shqipëria të jetë pro këtij Minishengeni kur Shqipëria ka gjithë atë det, dhe një fjalë u urtë nordike thotë se: nuk ka shtet të vogël në qoftë se ai ka det. Shqipëria e ka këtë pozitë të mrekullueshme gjeografike por donë të tregohet “zemërgjerë” me Serbinë antishqiptare! Pse Serbia nuk kërkon një port në shtetet sllave si Kroacia e Mali i Zi por nga Shqipëria. As këtë pyetje nuk ia bëjnë vetes politika e Tiranës?”.

-Politika është luftë dhe diplomaci për pushtet, për sundim dhe për imponim të interesave ndaj tjerëve. Kur nuk bëjnë fajde këto me mjete paqësore vijnë pazaret, intrigat, presionet, shantazhet, embargot e bllokadat dhe deri edhe forca ushtarake. Dhe rrjedhimisht që fitojnë dhe imponojnë më të fortët. Që të merresh e të respektohesh si aleat nga të tjerët duhet të jesh i fortë, ose t’u bindesh të tjerëve kur je dobët dhe i paaftë. Kështu ndodh në politikë dhe në marrëdhënie me shtetet e tjera. Ku janë politikanët shqiptarë dhe politika shqiptare sot. Janë të përçarë e të ngatërruar mes veti, nuk kanë a vizion, as program, as strategji dhe as përkushtim dhe as përgjegjshmëri kombëtare. Janë shumë të korruptuar dhe të interesuar vetëm për interesin personal të tyre. Historia dhe koha nuk të fal dhe as nuk të dhuron gjëra të gatshme. Ndërsa shqiptarët si popull e komb kanë hall e shqetësim mbijetesën ,punën , sigurinë, shpresën, sigurinë e mirëqenien dhe vetëm sa largohen nga atdheu. Shikoni Greqia ka grabitur mija ishuj dhe gjysma e saj është me troje shqiptare; shikojeni Serbia e pashallëkut të Beogradit është ngritur mbi troje iliro-dardane dhe përsëri të pangopura: As këtë pyetje nuk ia bëjnë vetes politika e Tiranës? Historia botërore që nga lashtësia është mbushur me lufta e konflikte për interesa politike, ekonomike e sundimi , ashtu si brenda fiseve në lashtësi, e pastaj edhe në organizime principatash, qytet-shtetesh, mbretërish , perandorish dhe tani prej 200 vitesh mes shtetesh kombëtare. Në këtë rrugëtim të gjatë historik më të humburit në Evropë kanë qenë shqiptarët. Shqiptarët kanë qenë jashtë angazhimeve për interesin kombëtar, dhe gjatë historisë kanë qenë subjekt, vasal dhe i të bindurit urdhër zbatimit dhe në shërbim të të huajve, herë perandorisë latino-romake, pastaj asaj Bizantine, venedikasve, anzhuinëve dhe mbretërve e carëve serbë e bullgarë në Mesjetë, Perandorisë Osmane më pastaj, dhe shqiptarëve iu shkaktua tragjedia më e madhe në fundin e shekullit të 19-të dhe gjatë shekullit të 20-të me copëtimin dhe me pazaret që Evropa bëri me trojet shqiptare.

Lexoni edhe:

Pisllëqet që bënë Hashim Thaçi, i zbatojnë lakmitarët për pushtet tjerët

Nuk është faji i brezit të sotëm për këtë gjendje të shqiptarëve, por janë të huajt ata të cilët kanë vendosur për shqiptarët gjithmonë. Kështu kanë vepruar të huajt kundër shqiptarëve sepse atyre u kanë interesuar gjithmonë interesat e tyre dhe fakti që kombet e tjera edhe kanë ditur të organizohen dhe të mobilizohen në kohë. Kombet e mirë organizuara pavarësisht se edhe të vogla për nga numri dhe nga territori falë aftësisë organizuese kombëtare të energjive politike, ekonomike e ushtarake mundën të pushtojnë globin dhe të ndërtojnë Perandoritë e tyre milionëshe me kilometra katrorë territore , dhe milionëshe me popullsi si: romakët, arabët, mongolët, Anglia, Franca, Spanja, Austro-Hungaria, Turqia, e deri edhe Holanda, Danimarka e Portugalia që ishin shumë të vogla. E gjithë kjo histori sundimtarësh perandorakë është motivuar vetëm prej interesave politike, ekonomike ,strategjike dhe materialiste.
Është i kotë pretendimin i konflikteve fetare, lufta fetare të mirëfillta nuk ka pasur, ato vetëm kanë qenë përdorur për motive mashtrimi për të angazhuar popujt dhe për të justifikuar pushtimet për qëllimet kolonialiste. Fatkeqësisht shqiptarët epoka e Rilindjes e fundit të shekullit të 19-të dhe fillimi i shekullit të 20-të, i gjeti të vetëm në përpjekjet e tij kombëtare dhe kundër të gjithë pjesës tjetër të Evropës.

Është për t’u falënderuar sot puna e shumë studiuesve, historianëve dhe patriotëve shqiptarë të cilët janë angazhuar me punën e tyre për një Rilindje të Madhe Kombëtare, dhe në përpjekjet e tyre të jashtëzakonshme intelektuale për ndërgjegjshmin e Evropës dhe Botës për atë se kush kanë qenë dhe kush janë shqiptarët. Mirëpo bota tjetër joshqiptare vetëm maskën ka ndërruar, pasi është po ajo e interesave politike, ekonomike, ekspansioniste dhe materialiste, dhe sado që do të mundohen shqiptarët e të përpiqen për t’i treguar Evropës e Botës se shqiptarët janë kombi më i vjetër evropian , që ka nxjerrë mbretër, perandorë e vezir për perandoritë e mëdha por fatkeqësisht jo ilire dhe joshqiptare, luftëtarët legjendarë evropian mbrojtës, pashallarë dhe pashallëqe shqiptare anti osmane, si dhe shenjtorë e papë, përsëri Evropa do shumë kohë që të ndryshojë karakterin imperialist, ekonomik, hegjemon dhe e ka të vështirë që ta korrigjojë veten nga gabimet dhe krimet që kanë bërë paraardhësit e tyre me padrejtësitë e tmerrshme kundër shqiptarëve. Në këto përpjekje e vetmja shpresë e shqiptarëve janë SHBA-të, te ato është siguria dhe shpresa e shqiptarëve, pasi të gjitha fuqitë e mëdha evropiane nuk janë realisht pro shqiptare, por tashmë edhe ato aziatike si Kina dhe India, edhe ato nuk janë me shqiptarët.

Duhet të kemi kujdes, sepse armiqtë e shqiptarëve do të bëjnë maksimumin ashtu si edhe më parë që të përçajnë dhe t’i ngatërrojnë shqiptarët me SHBA-në , por edhe me Gjermaninë e Turqinë sepse një nga strategjitë kryesore të tyre është që shqiptarëve t’u pamundësojnë miq dhe aleatë, pra që t’i izolojnë. Shqiptarët duhet të maten politikisht dhe t’i mirë peshojnë veprimet politike dhe ato diplomatike sepse bota sot është bërë më gllabëruese dhe më e rrezikshme për kombet dhe popujt e vegjël, në disa raste është mirë që politikanët shqiptarë edhe të qëndrojnë indiferent karshi ngjarjeve të mëdha globale sepse nuk kemi takat për të ndikuar dhe as për t’u përzier fort në to përderisa as nuk i pyet aktualisht kush. Të ndërtojmë marrëdhënie politike, ekonomike dhe ushtarake e strategjike me gjithë ato kombe që na duan dhe na respektojnë në mënyrë që të jemi edhe të besueshëm ndërkombëtarisht. Shqiptarëve u janë rrëmbyer troje, territore,lumenj, det, male dhe nuk ka pse t’i falin të tjera vetë sot atyre që kanë ngritur shtetet mbi trojet shqiptare; nuk ka pse Shqipëria t’i japë Serbisë daljen në Adriatik. Kujdes se Bota duke parë se shqiptarët janë tolerant ndaj të huajve, ata, pra bota nuk e kanë për gjë që t’u bëjnë akoma edhe sot dëme, pazare dhe pabesi e tradhti Shqipërisë dhe shqiptarëve”.

Shkrimet në këtë rubrikë nuk shprehin qëndrimet e gazetës "Kosova Sot Online".