Qeveria ta përgatis fshesën e madhe për ta pastruar policinë dhe prokurorinë nga strukturat që po ja bëjnë avokatin krimit të organizuar!

Shkruan: ANALISTI - Dardan Grapci

Arrestimi i biznesmenit kosovar, Bashkim Osmani duhet të jetë një motiv shtesë, madje edhe detyrim për institucionet e shtetit të Kosovës, që urgjentisht të niset me hapjen e dosjeve të krimit të të gjithë atyre biznesmenëve dhe politikanëve të cilët në emër të ligjit, kanë bërë shkelje marramendëse, abuzime ligjore duke bërë edhe marrëveshje kriminale me kompanitë e ndërtimit dhe kompanitë tjera të cilat e kanë pasur për synim degradimin e Prishtinës, por edhe të Kosovës në fushën e ndërtimit.

Edhe pse në princip thuhet që krimi shkojnë gjithmonë një hapë përpara institucioneve të ndjekjes, atyre të sundimit të ligjit, policisë, hetuesisë, AKI-së e gjyqësorit, nëse i analizojmë këto dy dekada të kaluara, nuk mundë të themi , e aq më pak të petohemi se krimi në fushën e pastrimit të parasë së pistë ka ndodhur në Kosovë pa dijeninë e institucioneve të drejtësisë. Pra me të drejtë shtrohet nevoja e adresimit të përgjegjësisë, dhe të paraqitet pyetja: A e ka ditur policia e Kosovës për Bashkim Osmanin që ka vepruar në bashkëpunim me grupet mafioze shqiptare, që këta po shpërndajnë drogë, dhe po bëjnë trafikim me qenie njerëzore për ta forcuar tregun e prostitucionit kudo në Botë?.

Lexoni edhe:

Kosova me projektin VETTING, para ndryshimeve të mëdha në drejtësi!

Gjerat po dalin në shesh sepse ato po zbulohen gjithandej nëpër botë, nëpër shtete të ndryshme ku jetojnë dhe veprojnë Kosovaret, prandaj edhe Qeveria e Kosovës duhet urgjentisht që në koordinim me ministren e drejtësisë Albulena Haxhiu ta pastrojnë gjyqësorin dhe prokurorin, duke sjellë njerëz të rinj dhe me vlera, të cilët dinë si kryhet një proces hetimor, një procedurë gjyqësore pa u korruptuar, dhe duke sjellë njerëz të cilët nuk kanë frike nga kërcënimet dhe shantazhet. Duke qenë se po shtohen rastet e zbuluara të lidhjes së politikës me grupet e inkriminuara brenda e jashtë vendit, i bëj kërkesë Qeverisë Kurti që sa më shpejtë të hyj në fuqi Ligji i Vettingut, sepse vetëm me këtë ligj Kosova do të pastrohet nga korrupsioni, droga, prostitucioni etj.

Shkrimet në këtë rubrikë nuk shprehin qëndrimet e gazetës "Kosova Sot Online".