Lexoni edhe:
Bananet e gjelbra apo të pjekura, cilat janë më të shëndetshme?
Kuka për Majlindën: Vepër e inspirimit se si duhet atdheu
Majlinda Kelmendi dje me një ceremoni shtetërore edhe zyrtarisht i dha fund karrierës së saj të bujshme si xhudiste. Kampionia e parë olimpike nga Kosova u dekorua nga presidentja Vjosa Osmani me urdhrin “Shotë Galica”, dje gjatë ceremonisë. Trajneri i saj, Driton Kuka, përmes profilit të tij në Facebook reagoi duke thënë se ndihet krenar me veprën e saj, teksa listoi edhe të gjitha medaljet që i ka fituar gjatë karrierës Majlinda Kelmendi. “Faleminderit Majlindë! Sa shumë krenar me veprën tande. Vepër e inspirimit se si duhet atdheu”, shkroi Kuka në Facebook.
Majlinda konsiderohet si sportistja më e madhe që e ka pasur ndonjëherë Kosova. Ajo e arriti kulmin e karrierës në vitin 2016 kur ia solli Kosovës medaljen e parë të artë olimpike nga “Rio 2016”. Ndër të tjera, ajo është shpallur dy herë kampione botërore dhe katër herë kampione evropiane. Në total, Majlinda i ka fituar 46 trofe në sportin e xhudos. Në gara të rëndësishme, ajo i ka koleksionuar 29 medalje të arta, 6 të argjendta dhe 9 të bronzta. Majlinda e kishte përfaqësuar Shqipërinë në Olimpiadën e Londrës më 2012, ndërsa këtë vit mori pjesë në Olimpiadën e Tokyos, ku nuk ia doli ta mbronte titullin e kampiones.
Tash e tutje, Kelmendin do ta shohim në zejen e trajneres, pasi ajo do të jetë asistente e trajnerit Driton Kuka.
(Kosova Sot Online )
