Muriqi e ka mendjen veç te Turqia

Sulmuesi kosovar i Lazios nuk është i interesuar të transferohet as në Angli, e as në Francë e Rusi

Vedat Muriqi duket se e ka ndarë mendjen.

Sulmuesi kosovar e sheh të ardhmen e tij veç në futbollin turk.

27 vjeçari do të largohet këtë muaj nga Italia pasi nuk arriti të linte gjurmë në Lazio.

Për një vit e gjysmë prizrenasi ia doli t’i shënonte vetëm dy gola në fanellën “Biancocelesti”.

Dhe, Lazios i ka humbur durimi dhe ka vendosur ta shesë përfundimisht përfaqësuesin kosovar.

Këtë muaj, interesim për Muriqin kanë shfaqur klubet angleze si Leeds United, Hull City e West Bromwich Albion.

Ndërsa, në Francë atë e pëlqen Saint Ettiene e në Rusi, CSKA Moska.

Por, në mendjen e ish-futbollistit të Rizesporit qëndron vetëm Superliga turke, njoftojnë mediat italiane.

Ai dëshiron të rikthehet në Stamboll, ku e presin krahëhapur ish-klubi i tij, Fenerbahçe dhe Galatasaray.

Muriqi është duke e pritur një ofertë zyrtare nga ndonjëri prej gjigantëve turk.

Ai e kaloi pjesën më të mirë të karrierës në futbollin turk. 

(Kosova Sot Online)