Ermal Krasniqi i lumtur për interesimin e klubeve: Mund të luaj kudo në Evropë
Ermal Krasniqi është sensacioni i vitit 2023 i futbollit kosovar. Ish-futbollisti i Ballkanit ka shpërthyer në futbollin rumun me ekipin CFR Cluj dhe vlera e tij po rritet dita-ditës, transmeton "Kosova sot Online ".
Rumunët e blenë atë për 200 mijë euro dhe menjëherë lojtari ofanziv u bë startues i ekipit të Dan Petrescut, madje duke debutuar me gol dhe me asistim në derbin kundër Farul.
Aktualisht, thuhet se 24 vjeçarin po e vëzhgojnë klubet italiane si Fiorentina, Torino, e mbi të gjitha Lazio, pasi atë e pëlqen trajneri Maurizio Sarri, që e pati rastin ta shihte në përballjen e këtyre dy klubeve në garat evropiane.
Krasniqi, i cili i ka realizuar katër gola për Clujin prej janarit, e ka dhënë një intervistë për mediumin rumun “ProSport”, për të cilin ka folur për eksperiencën në Rumani dhe për të ardhmen, përcjell “Kosova Sot Online".
Krasniqi kishte ofertë edhe nga Gjermania, ku e pëlqente klubi i Bundesligës, Hoffenheim, por ai vendosi ta vazhdojë karrierën në Rumani, për ta bërë më pas, më vonë, hapin tjetër dhe të rëndësishëm në karrierë.
“Interesimi i Cluj ishte i madh dhe fakti që trajneri ynë, Dan Petrescu më donte këtu, më bëri të mendoja shumë kur e mora ofertën. Jam i lumtur që po drejtohem nga njëri prej trajnerëve më të mirë rumunë, i cili po ashtu ka qenë lojtar mjaft i mirë i vendit tuaj”, ka thënë fillimisht Krasniqi.
“Unë u përshtata shpejt dhe mjaft mirë sepse njerëzit në klub më mirëpritën dhe më ndihmuan shumë. Mendimi im është se niveli i futbollit në Rumani është më i lartë sesa ai në Kosovë”, vazhdoi futbollisti kosovar, i cili i lavëderon bashkëlojtarët, për të cilët thotë se janë të nivelit të lartë.
Tash flitet se klubi rumun i kërkon 5 milionë euro për kartonin e Krasniqit.
Por, a është kjo një vlerë reale për futbollistin kosovar?
“Nuk është në kompetencën time të flas për shifra. Krejt çka duhet të bëj unë është të luaj sa më mirë të jetë e mundshme për Cluj, dhe nëse më duhet të transferohem, presidenti i klubit do të vendosë se cila do të jetë oferta më e mirë”, nënvizoi tutje lojtari i krahut të majtë.
Por, kur do të ishte koha ideale për Krasniqit që ta bëjë një hap tjetër të madh në karrierë?
“Për momentin jam i fokusuar tek CFR Cluj dhe do ta jap më të mirën nga vetja në çdo ndeshje që t’i arrij objektivat e klubit. Por, nëse ofertat arrijnë, do të isha i lumtur dhe i kënaqur t’i pranoja ato në çdo kohë”, thotë Krasniqi.
“Ndihem i nderuar që janë tri klube që po më ndjekin. Kjo më motivon që të punoj më fort çdo ditë për ta realizuar ëndrrën time”, vazhdoi ai.
Së fundmi, Krasniqin e ka lavdëruar trajneri i Lazios, Maurizio Sarri, i cili do të donte ta ketë në dispozicion në të ardhmen futbollistin ofanziv.
“Ndihem mirë që trajneri i ish-rivalëve tanë më ka lavdëruar. Jam i nderuar, por mbetem modest dhe mendoj se nuk i kam demonstruar ende krejt kualitetet e mia. Unë punoj çdo ditë që të bëhem më i mirë dhe vëmendja e një trajneri të madh si Maurizio Sarri më bën edhe më të motivuar çdo ditë. Mendoj se mund të luaj dhe ta përballoj çdo ligë evropiane. Por, për momentin vetëm po mendoj rreth zhvillimit dhe përparimit tim në CFR Cluj”, përfundoi Ermal Krasniqi. Futbollisti kosovar nuk është ftuar nga selektori Alain Giresse për ndeshjet e marsit përkundër formës së tij optimale.
(Kosova Sot Online )
