E quajnë “ferri në tokë” – shiheni se si duket burgu në të cilin Robinho do të kalojë nëntë vite të jetës së tij

23 March 2024 - 14:58

Futbollisti legjendar brazilian, Robinho u arrestua mëngjesin e djeshëm (e premte) pasi gjykata në Brazil vendosi ta dënojë me nëntë vite burg, aq sa ishte dënuar më parë në Itali, transmeton "Kosova Sot Online ".

Robinho u dënua më shumë se dy vjet më parë për përdhunimin në grup të një gruaje shqiptare që ndodhi në Milano në vitin 2017. Mirëpo, ai nuk shkoi në burg në Itali sepse u arratis në Brazil dhe ligji i këtij vendi nuk lejonte ekstradimin e shtetasve të tij. Por, tani gjykata në Brazil ka vendosur të njohë vendimin nga Italia dhe Robinho duhet të vuajë dënimin në atdheun e tij. Ish-sulmuesi 40-vjeçar do të vuajë dënimin në një nga burgjet më famëkeqe në Brazil, që ndodhet në Pernambuco.

Lexoni edhe:

Fati i Kosovës ishte edhe fati i gazetës KOSOVA SOT

Burgu në Pernambuco njihet si më i mbipopulluari në vend dhe publiku brazilian e quan “ferri në tokë”, gjë që flet shumë për kushtet që mbizotërojnë atje.

Objektet e projektuara për 10,500 të burgosur shpesh përmbajnë rreth 32,000 njerëz, sipas një studimi të vitit 2015 nga Human Rights Watch.59 për qind e të burgosurve janë në pritje të gjykimit dhe strehohen së bashku me të burgosur tashmë të dënuar, gjë që është një shkelje e ligjit brazilian.

Ky burg është i njohur për kriminelët e rëndë, bosët e shumtë të drogës, përdhunuesit, por edhe për kushte shumë të këqija sepse banjat e tij kanë vrima në dysheme, kushte të tmerrshme sanitare, e në mediat braziliane përmenden edhe raste të shumta të dhunës seksuale brenda mureve.Burgu njihet edhe për një incident të madh në vitin 2016, kur të burgosurit rrënuan murin me eksploziv dhe më pas mbi 100 prej tyre u arratisën për në liri.

Robinho ka padyshim vite të vështira përpara tij. Ai e përfundoi karrierën e tij futbollistike në vitin 2020 në fanellën e Santos, ndërsa më parë ka luajtur për Basaksehir, Sivasspor, Atletico Mineiro, Guanzhou Evergrande, Milan, Manchester City dhe Real Madrid.

Robinho la gjurmët më të thella në Milan dhe Real Madrid. Ai luajti 144 ndeshje për kuqezinjtë, duke shënuar 32 gola dhe duke regjistruar 30 asistime, ndërsa për klubin mbretëror shënoi 35 gola dhe regjistroi 27 asistime në 137 ndeshje.