Lexoni edhe:
Për tri orë shi në Prishtinë i merr uji “përjetimet” e Përparim Ramës
Sauditët blejnë tetë herë kampionin e Francës dhe ‘vjedhin’ njeriun kyç nga PSG
Lajmi se klubi i futbollit Monaco do të marrë pronarë të rinj, nga Arabia Saudite, goditi publikun francez si rrufe në qiell, transmeton "Kosova Sot Online ".
Monaco është në shitje prej disa muajsh, ndërsa ditët e fundit negociatat me investitorët sauditë janë intensifikuar dhe disa detaje tashmë kanë dalë në publik.
Gazeta e njohur L’equipe njoftoi se tashmë është rënë dakord që Luis Campos të jetë në krye të të gjithë projektit, gjë që tronditi të gjithë, veçanërisht drejtuesit e Paris Saint Germain sepse Campos është një nga njerëzit kyç në menaxhimin e këtij projekti të klubit parisien.
Campos është aktualisht në krye të strategjisë së klubit te PSG dhe më parë ka mbajtur postin e drejtorit sportiv, ndaj largimi i tij sigurisht që do të ishte një goditje e rëndë për ekipin nga Parku i Princave.
Portugezi 59-vjeçar me eksperiencë duhet të emërohet president i klubit në Monaco dhe do t’i lihet dora e lirë për të udhëhequr ekipin në majat e futbollit evropian.
Gazeta L’equipe njoftoi gjithashtu se PSG do të kërkojë një shpjegim për veprimet e tilla nga sauditët dhe takimi do të mbahet gjatë ditës.
Që nga blerja e sauditëve, PSG vendosi dominimin në futbollin francez dhe ishte kampion 11 herë në 13 vitet e fundit, dhe mbretërimi i tij u ndërpre vetëm nga Monaco dhe Lille, të cilët arritën të fitonin nga një titull në periudhën e përmendur.
Interesant është edhe fakti që Campos më parë ka punuar në Monaco, ku ka qenë drejtor teknik dhe drejtor sportiv, ndaj këtë verë mund të shohim rikthimin e tij në Principatë.
(Kosova Sot Online )
