Malisheva synon ta ruajë kapitalin, Llapi e kërkon mrekullinë

G.g /
18 July 2024 - 11:39

Dy skuadrat kosovare, Llapi e Malisheva do t’i zhvillojnë sot ndeshjet kthyese në garat evropiane.

Ekipi i Llapit do ta ketë një punë shumë të vështirë ta kthej disavantazhin prej 2:0 përballë Wisla Krakow, në stadiumin “Zahir Pajaziti” të Podujevës.

Të besuarit e Tahir Batatinës pësuan humbje një javë më herët në udhëtim, në kuadër të kualifikuesve të Ligës së Evropës.

E tash, ata i pret një punë e madhe sot në ndeshjen që do të fillojë në orën 16:30.

Po sot, por nga ora 21:00, Malisheva luan në udhëtim te Buduçnosti në Podgoricë.

Ekipi malishevas që po paraqitet për herë të parë në histori të tyre në garat evropiane, e nisën për mrekulli fazën kualifikuese të Ligës së Konferencës.

Malisheva fitoi takimin e parë minimalisht 1:0 me një super gol të Etnik Brrutit.

Djelmoshat e Qëndrim Kidën do të mundohen ta ruajnë këtë epërsi dhe të kalojnë tutje.

Përveç Llapit e Malishevës, në garat evropiane janë edhe Ballkani dhe Drita.

Suharekasit tash do të vazhdojnë garën në Ligën e Konferencës, kurse Drita do të paraqitet nga faza e ardhshme e Ligës së Konferencës.