Kosova mposhtet nga Estonia në dy sporte për një ditë

Përfaqësueset U20 të Kosovës në basketboll e në hendboll të premten e kishin një të përbashkët. Të dyja u mposhtën nga Estonia në kuadër të Kampionateve Evropiane të Divizionit B.

Në basketboll, Kosova U20 humbi nga Estonia me rezultatin 69:60. Ndeshja ishte për plasman përfundimtar nga pozitat 9 deri në 16. Rron Dahsyla i kishte 11 pikë e 11 kërcime te Kosova, ndërsa Bardh Istrefi i realizoi 18 pikë e shtatë kërcime.

Tani Kosova luan për plasman nga pozitat 13 deri në 16. Të shtunën përballet me Irlandën. Evropiani B në basketboll po zhvillohet në Mioveni të Rumanisë.

Ndërkohë në hendboll Evropiani U20 i Divizionit B po zhvillohet në Prishtinë.

Të premten Kosova pësoi 28:18 nga Estonia në garën për plasman nga pozitat prej 5 deri në 8. Olsi Mulaj ishte më efikasi me katër gola, por nga 11 tentime. Tani Kosova luan për vendin e shtatë me Lituaninë.

(Kosova Sot Online)