Broja tërheq interesim nga klubi gjerman

Sulmuesi i Shqipërisë, Armando Broja, karrierën mund ta vazhdojë në elitën e futbollit gjerman.

Të hënën mediumet gjermane kanë raportuar se për Brojën ka shprehur interesim skuadra që do të garojë në Ligën e Kampionëve, Stuttgart.

Në fakt, Stuttgarti është duke kërkuar huazimin e sulmuesit të Shqipërisë nga Chelsea.

Broja nuk bën pjesë në planet e trajnerit të ri të Chelseat, Enzo Maresca.

Broja së bashku me Romelu Lukakun dhe mbrojtësin Trevoh Chalobah janë dërguar për t’u stërvitur me ekipin U21 të Chelseat, deri në zgjidhjen e kësaj situate.

Për 22-vjeçarin kanë shprehur interesim edhe disa skuadra të tjera evropiane si Dortmundi, Milani, Juventusi dhe Monaco. 

Gjysmën e sezonit të kaluar, Broja e kaloi te Fulhami, derisa më herët në karrierën e tij, sulmuesi shqiptar ka luajtur edhe te Southamptoni e te Vitesse.

(Kosova Sot Online)