Nëse do të ishte trajner i Anglisë Sir Alex Ferguson ‘do ta kishte nënshkruar tashmë me këtë lojtar

“Nëse do të ishte dhjetë vjet më parë, Manchester United do të kishte bërë një ofertë prej 70-80 milionë funtesh dhe do ta kishte marrë atë djalë.”

Një ish-lojtar i Manchester United beson se klubi do ta kishte nënshkruar tashmë me një futbollist aktual të kombëtares angleze nëse Sir Alex Ferguson do të ishte ende në krye të ekipit.

Nicky Butt, i cili ka fituar tetë tituj të Premier League, katër FA Cup dhe një Ligë të Kampionëve gjatë 12 viteve të tij në Old Trafford, ka dhënë një vlerësim kritik për problemet aktuale të ish-klubit të tij.

Skuadra e Ruben Amorim ndodhet në vendin e 13-të në Premier League me vetëm tetë fitore nga 24 ndeshje të mundshme – një seri rezultatesh që, sipas shumë analistëve, e bëjnë këtë version të Manchester United ekipin më të dobët të epokës pas-Ferguson.

Pas një serie prej katër ndeshjesh pa humbje, Djajtë e Kuq u kthyen me këmbë në tokë të dielën, kur u mposhtën 2-0 nga Crystal Palace.

Ka qenë një sezon për t’u harruar për United, dhe ish-mesfushori Butt dha një vlerësim të ashpër mbi sfidat që klubi ka për të garuar me skuadra si Manchester City dhe Arsenal.

“Dëgjoni, Manchester United është miliona milje larg nga të qenit sfidues për titullin,” tha 50-vjeçari për Stadium Astro. “Shikoni Liverpool-in, Arsenalin, Man City-n dhe mënyrën se si Chelsea po ndërton ekipin e tij”.

“United ka një punë gjigante përpara dhe do të duhen tre, katër, pesë vite për t’u rikthyer në pozitën për të sfiduar sërish për titull. Mund të fitojnë ndonjë kupë me pak fat, por sigurisht që nuk do të jenë pretendentë për Premier League për disa vite.

“Do të kërkojë shumë durim, shumë planifikim, shumë para dhe blerje të duhura për t’u rikthyer në nivelin e duhur. Liverpool nuk po ndalet, Arsenal do të bëhet edhe më i fortë, Man City do të përmirësohet sërish, Chelsea po rritet”.

“Sado që e dua Manchester United, ata nuk kanë të drejtën hyjnore për të fituar trofe. Ky është një projekt i madh. Ata nuk do të marrin dhjetë lojtarë këtë verë dhe të luftojnë për titull sezonin tjetër – thjesht nuk do të ndodhë”.

“Pra, gjithçka varet nga projekti dhe plani, dhe do të marrë kohë. Ata duhet të shpenzojnë para, çfarëdo që të kushtojë, për të marrë katër apo pesë lojtarë të nivelit të lartë, lojtarë të vërtetë, burra të vërtetë. Pastaj këta djem të rinj që janë tashmë në klub mund të rriten përkrah tyre”, shtoi ai.

Sipas Metro, Butt përmendi emrin e anësorit të Crystal Palace dhe Anglisë, Eberechi Eze, si një lojtar që Sir Alex Ferguson do ta kishte nënshkruar gjatë periudhës së tij të artë te United.

Eze, i cili debutoi me Anglinë në vitin 2023 kundër Maltës, u lidh me një kalim te Manchester City dhe Tottenham verën e kaluar pas një sezoni mbresëlënës te Crystal Palace.

 “Manchester United nuk e ka atë grupin e fortë të lojtarëve, prandaj duhet të hapin librin e çeqeve dhe të nënshkruajnë me lojtarë 80 milionë funtesh, siç bënin dikur”, shtoi ai.

“Djali te [Crystal] Palace, Eze – nëse do të ishte dhjetë vjet më parë, Manchester United do të kishte bërë një ofertë prej 70-80 milionë funtesh dhe do ta kishte marrë atë djalë. Ata nuk mund ta bëjnë tani sepse nuk e kanë më atë fuqi, dhe kjo është gjëja më shqetësuese”.

(Kosova Sot Online)