“Po vjen në shtëpi”, Dua Lipa i gëzohet kalimit të Anglisë në finale

G.g /
08 July 2021 - 12:21

Mbrëmë, Kombëtarja e Anglisë ka shënuar fitore ndaj asaj të Danimarkës, duke siguruar biletën për në finalen e madhe të kampionatit evropian “EURO2020”, e cila do të mbahet këtë të diele në “Wembley Arena” në Londër.

Kualifikimit të Anglisë i janë gëzuar emra të shumtë, ndër ta edhe këngëtarja shqiptare me famë botërore, Dua Lipa, e cila jeton në Angli.

Dua tregoi se e ndoqi me miqtë e saj ndeshjen e mbrëmshme, teksa ishte veshur enkas me ngjyrat e flamurit anglez dhe kishte vizatuar simbolin e flamurit në të dy faqet e saj.

Në fotografitë e publikuara në rrjetin social “Instagram”, Dua dukej shumë e buzëqeshur dhe në disponim teksa së bashku me miqtë e saj ndiqnin ndeshjen.

“Po vjen në shtëpi”, shkroi këngëtarja shqiptare në mbishkrimin e këtyre fotografive, duke iu referuar sloganit të famshëm të britanikëve për rikthimin e trofeut të futbollit në Mbretërinë e Bashkuar, aty edhe nga ku ka lindur ky sport.

Dua është e lindur dhe rritur në Londër të Mbretërisë së Bashkuar, teksa për disa vite me radhë në periudhën e adoleshencës, ka jetuar në Kosovë së bashku me familjen e saj.